E hobencita, Anais Helder, kende ta miembro di FAVI, a splica den su propio palabranan, kico ta nifica Dia di Garoti blanco strepi cora p’e y pa su amigitonan.
Pa personanan cu ta wak bon, pa nan duna personanan cu e garoti chens, pa nan por crusa caya. Anais a pidi pa automobilistanan respecta esnan cu tin garoti y pa nan core trankil, sin problema y pa nan por para pa nan.
Sari Wernet, Terapista di FAVI, a splica cu a dicidi e aña aki cu nan kier a haci algo diferente encuanto dia di Garoti. A cuminsa celebre desde dia 15 di September y e meta pa e aña aki ta pa educa comunidad.
Door di educa nan clientenan, pero tambe involucra e muchanan di FAVI. Na Aruba ta conoci cu e usuario di e garoti ta un persona di edad mas avansa. Pero masha poco sa cu muchanan tambe ta uza garoti. Na Aruba tin actualmente 3 mucha cu ta uza garoti. FAVI ta mira e importancia cu nan tambe ta forma parti di e trafico di Aruba. Pa e motibo ey, e aña aki nan ta dilanti di Bestuurskantoor. Nan a haci un demostracion cu mucha. Nan tabata tin un daycamp 1 y tur mucha a haya informacion kico ta garoti, incluyendo algun boluntario hoben. FAVI ta educando e boluntarionan desde mucha y nan ta yuda esnan cu tin limitacion di bista.
Manera tur aña FAVI ta sali riba caminda pa mustra nan garoti y mustra trafico con clientenan di FAVI ta uz’e ora di crusa caya y esey ta pa educa comunidad, den forma di mucha. Durante e demostracion tabata tin polis presente, tabata tin guiadornan, tabata tin muchanan cu ta parti flyers, tambe e vocero, sr. Ivan Thiel y tambe tabata tin diferente mucha cu a duna un tarea pa e actividad, pa asina nan tambe por ta envolvi pa e Dia di Garoti.
Comunidad a cuminsa respeta e garoti. FAVI ta hayando mas cooperacion y yudansa riba caminda. Pero semper ta keda e importancia pa keda educa. Por ta awe tabata tin un bon trafico. Claro cu tabata tin Cuepro Policial cu a yuda, pero den bida real, por pasa cu por tin un of dos automobilista, cu no lo duna preferencia of lo para den e caso aki, coopera cu un persona cu limitacion di bista. Pa FAVI ta keda importante pa bin afo y keda educa nos comunidad riba e aspecto aki.