Marieke Koekoek, miembro di Tweede Kamer p’e partido politico Volt, a formula algun pregunta n’e Secretarionan di Estado di Salud, Bienestar y Deporte y di Interior y Relacion di Reino riba e acceso n’e atencion p’e personanan indocumenta na Aruba, Sint Maarten y Corsou.
E preguntanan aki, presenta dia 12 di februari, tin como obhetivo mehora e situacion di e refugiadonan y di e migrantenan indocumenta den e tres paisnan di Reino.
Den su prome pregunta, Koekoek a referi riba e carta di progreso di october ultimo, cu a sigui un mocion Simons adopta, cu ta pidi e gobierno Hulandes sinta na mesa cu e organisacionnan no gubernamental manera Sala pa Tur, Venex y Fundashon Bos di Hubentut.
E diputado kier sa na ki nivel a hiba e combersacionnan cu dicho organisacionnan den cuadro di e mocion en cuestion.
E di dos pregunta ta enfoca riba e compromiso cu e atencion di salud y e proteccion di e menornan indocumenta y con e asistencia tecnico di Hulanda ta adapta na nan. Esaki ta enfatisa e importancia di e acceso n’e atencion p’e gruponan vulnerabel.
E miembro di Tweede Kamer ta propone pa organisa un forma structural di aportacion n’e organisacionnan local aki den cuadro di e “Consulta riba asistencia den e cuater paisnan.”
E proposicion aki ta reconoce e importante papel cu e organisacionnan social local ta hunga den e atencion na migrante y refugiado indocumenta, segun Koekoek.
Finalmente, Koekoek ta yama e atencion riba e accesibilidad y disponibilidad di medicamento pa HIV y otro malesa infeccioso dentro di e contexto di e atencion na Aruba, Corsou y Sint Maarten. E pregunta aki ta resalta e necesidad di haci cu e atencion medico ta inclusivo y accesibel p’e migrantenan indocumenta.