Microsoft a anuncia diahuebs e introduccion di e prome cambio importante di e ultimo decadanan riba su keyboard: e tecla nobo Copilot, cu cual lo e desktopnan cu Windows11 lo conta cu ne. Diseña pa mehora e experiencia di usuario, e tecla ta marca e comienso di “e aña di e computernan potencia pa inteligencia artificial.”
E innovacion ta priminti catalisa e evolucion di con e usuarionan lo interactua cu su dispositivonan. Integra den e ecosistema Windows, Copilot ta ofrece un experiencia di interaccion mas natural y intuitivo y ta amplifica e capacidadnan di e usuarionan na ora di realisa nan tarea diario, ya sea converti nan idea den cancion, crea imagen bunita, draft bon redacta of yuda cu otro experiencia.
E tecla nobo di inteligencia artificial aki ta marca p’e logotipo di Copilot den forma di cinta y lo ta ubica cerca di e space-bar. Riba algun computer e lo substitui e tecla CTRL drechi, mientras cu riba otro lo reemplasa e tecla di menu.
E rediseño di e keyboard lo representa e mayor cambio di Microsoft desde cu el a introduci e tecla Windows den e añanan 90, cu tabata un elemento fiho riba e keyboardnan orienta na su sistema operativo durante por lo menos 30 aña.
E prome den incorpora e tecla Copilot tabata Dell, cu a presenta diahuebs su generacion nobo di laptop XPS. Microsoft ainda no a anuncia ki otro fabricantenan lo bay incorpora e cambio nobo aki, fuera di su propio liña di laptop Surface, pero ta posibel cu esaki lo wordo divulga den CES, e mayor feria tecnologico di mundo cu lo tuma luga na Las Vegas otro siman y caminda cu algun empresa lo bay presenta nan modelo nobo.