NEW YORK, Merca- E lider di e banda The Rolling Stones a hay’e obliga di pospone su gira di nuebe siman door di Merca y Canada.
E cantante Britanico, Mick Jagger, di 75 aña lo haci un operacion di curason e siman aki na New York pa reemplasa un klep daña, segun e portal Drudge Report.
Ta pa e motibo aki cu e lider di The Rolling Stone a hay’e obliga di retrasa su gira di nuebe siman unda cu e lo mester a bishita varios ciudad Mericano como tambe Canada; e gira aki lo mester a cuminsa dia 20 di april na Miami.
Sin embargo, segun fuentenan cerca di e cantante, lo spera te ora cu Jagger recupera di su operacion pa asina e ta bek ariba escenario durante di zomer.
Diasabra ultimo Jagger a disculpa su mes ariba su cuenta di Twitter cu esunnan cu ya caba a cumpra nan entrada pa e tour y el a priminti di cu “e lo traha duro pa bolbe riba escenario lo mas pronto posibel”.
