Ayera den e reunion publico #5 di parlamento di Aruba nos ortografia di Papiamento a wordo oficialisa pa medio di un “Landsverordening schrijwijze Papiamento”. Nos Papiamento a wordo reconoci como un idioma official na 2003.
Tante parlamentarionan como ministernan a elogia tur e baluartenan cu a hiba un lucha pa añasnan largo pa trece Papiamento na e punto aki. Organisacionan manera “Lanta nos Papiamento” pero tambe e tantisimo artistanan local cu ta canta den nos idioma, esunan mas popular Jeon, Ataniro (Basic One), Cesar Olarte, Claudius Philips pero tambe gruponan di gaita manera “Chicas Gaiteras”. Cada un di nan a duna nan aporte pa nos Papiamento (Arubiano) haña su mesun ortografia.
Minister di Enseñansa, Sciencia y Desaroyo Sostenibel dr. Rudy Lampe a contesta honorable miembro di parlamento Drs Marisol Lopez – Tromp riba e resultadonan di scolnan multilingual, cual por sierto tawata iniciativa di Drs Marisol Lopez-Tromp tempo e tawata minister di enseñansa. Y e resultadonan ta papia pa nan mes, 10% mas mucha ta bai Colegio Arubano si nan ta procedente di un scol miltilingual den comparacion cu scolnan basico tradicional cu tin Hulandes como idioma di instruccion.
Tambe durante dicho reunion public honorable miembro di parlamento y mi college y amigo sr Alan Howell a entrega un mocion pa tur scol haci examen di trafico den Papiamento, algo cu sigur ta carga cu mi sosten y ohala otro ehempelnan asina por sigui.
Ami ta orguyoso di ta un persona multilingual, y mi ta kere esaki ta parti di e DNA di tur Arubiano. Sinembargo ta PAPIAMENTO tawata e base pa mi por a siña tur e conocemento cu awe mi a acomula. Y hopi biaha mi ta reflecciona na e añanan formativo di mi infancia y mi ta keda wonder, si ami a haña enseñansa den mi mesun idioma, con hopi mas leu lo ma yega academicamente? Mi ta kere cu hopi di mi generacion tambe ta puntra nan mes esey.
Pesey mes Scol Arubano Multilingual sigur cu lo carga cu mi sosten, pa asina futuro generacionan por siña den nan añanan formativo den nos dushi idioma Papiamento.
Y mi ta spera cu den futuro nos por dal mas stapnan positivo pa salvaguardia e existencia y importancia di nos idioma Papiamento, pa asina tur di nos cu ta biba y traha riba e pida barranca aki respite, papie y honre.