Michella Steenvoorde Laclé (MEP): Plan di mayor obligatorio pronto lo wordo trata den Parlamento

Dialuna merdia 7 di juni a tuma luga un tayer den cuadro di Sociaal Crisis Plan cu ta lidera pa e Departamento Mucha y Hoben bou guia di Sue-Ann Ras y Michella Steenvoorde Laclé. E tayer tabatin como meta logra miho palabracion cu diferente instancianan den con pa traha miho hunto ora ta trata di divorcio entre mayornan. Candidato di Partido MEP, Michella Steenvoorde Laclé a elabora mas tocante esaki.

Esaki tabata den cuadro di preparacionnan pa cu e concept landsverodening cu pronto lo wordo trata den Parlamento pa bin cu Plan di Mayor Obligatorio, ya caba ta trahando riba e structura pa su implementacion. Dicho ley ta conta cu un sosten amplio den e gremionan y a reuni cu stakeholdersnan pa asina hunto palabra riba e vision pa implementacion.

Den cuadro di continuacion di trabounan di Sociaal Crisis Plan 2, e ley di Plan di mayor obligatorio ta pone mayornan na momento di separa, reparti e responsabilidadnan di nan yiu via di un contracto. E ley lo wordo salvaguardia na Departamento pa Mucha y Hoben. Asina Sra. Michella Steenvoorde – Laclé, presidente di comision Voortgezet Ouderschap a splica tur e gremionan presente. Na Departamento pa Hoben y Mucha ta bay tin un afdeling Plan di Mayor (Ouderschapsplan).

E tarea di e departamento ey bou di supervision di comision Voortgezet Ouderschap y den cooperacion estrecho cu e gremionan lo ta:

Desaroya y maneha programanan preventivo y firma convenionan di trabou cu e NGO’s y departamentonan concerni pa loke ta trata ayudo di e mucha cu ta sufriendo un separacion di su mayornan.

Desaroya y maneha programanan preventivo y firma convenionan di trabou cu e NGO’s y departamentonan concerni pa loke ta trata ayudo di e mayornan pa loke ta trata mediacion prome/durante un separacion.

Desaroya y maneha programanan pa maneho di dato y estudionan relevante pa evalua/adapta y desaroya e maneho rond di e tema di separacion y e derechonan di e mucha pa cu esaki.

Desaroya y maneha programanan informativo rond di e tema aki y traha palabracionnan concreto cu e gremionan pa traha mas uniforma.

Desaroya y maneha hunto cu e gremionan un “Kind Check” pa casonan di divorcio compleho bou di un colaboracion estrecho cu GEA/OM/Orde van Advocaten & Sociaal Maatschappelijk Werkers.

Den e atardi aki a intercambia pensamento y e expertonan a duna tambe nan punto di bista y nan tipnan adicional pa extra ideanan kico mas lo mester pensa riba dje pa cu e ehecucion di esaki. Trabounan importante y pasonan concreto, pa traha hunto pa trece solucionnan pa pone derecho di nos muchanan central.

 

Comments

comments