Despues di a haci entrega di mas di 700 famia pakete di cuminda na esunnan menos afortuna durante e temporada di Pandemia, Fundacion ADRA a culmina un di nan principal esfuerzonan cu ta e graduacion di e programa Teenage Mothers to Life Coaches.
Un grupo grandi di hobennan a sigui e practica tumando como ehempel e 8 yabinan di bida mas saludabel a bin hunto pa asina haya nan diploma.
E idea di e curso ta pa duna e mamanan teenager un segundo oportunidad, door di un manera sumamente practico y efectivo, unda ta inclui les theoretico di entre otro cushinamento, cosemento, obra di man, beyesa, administracion basico y protocol. Pero tambe tumando en cuenta etiketa, salud mental y salud fisico.
Un danki na CEDE ARUBA, hunto cu KIWANIS PALM BEACH, Coordinador Centro Hoben y Famia hunto cu Monique di Wit Gele Kruis cu a traha inalcansablemente, pa e programa por a bira un realidad.
Michella Steenvoorde Laclé, den representacion di cie. Voortgezet Ouderschap “Plan di Mayor Obligatorio” tabata invitado na e graduacion, na unda a sigui di cerca loke e graduadonan a trece dilanti, encuanto e importancia di e curso y e significado y cambio cu e ta efectua den nan bida.
Marta Angela (24) tin tres yui, y a saca lo maximo di e les di cosemento.
Kristel Balseca a enfoca mas riba les di administracion y a splica cu e Mama jong su situacion ta hopi dificil, na momento di busca trabao y cu e lesnan di administracion esaki lo yuda pa traha un plan strategico y administra bo placa, hasta pa inicia cu un mini negoshi..
Sheila Herrera a haya e les di protocol y etiketa hopi importante. Bo ta siña sigur con pa set-up un mesa, e manera corecto pa sinta/come/bisti/comporta. Mantene bo cas limpi y na ordo. Limpia bo cas di pafo bin paden y hopi detayenan cu ta yudabo structura bo bida y bo famia.
Ruthlene Paesch, su enfoke a bay riba Salud Emocional esta Mental Stress. E cursista a splica e problemanan y solucion en cuanto confushon, depresion. Unda pa saca forza na momentonan di presion di bida, pa ta fuerte pa mi yiu y stima bo mes pa bo por stima bo yiu tambe. Controla bo rabia, pa bo no bisa cosnan cu bo ta arepenti di dje despues. E cursista ta sigui conta cu el a haya e oportunidad pa caba su scol y hasta e lo sigui pa logra su bachelors degree.
Mariana Martijn (24) tin un yiu di 4 aña y ta conta di su experiencia na unda atravez di Fundashon Hoben y Famia, por a sigui diferente workshops pa asina asumi e responsabilidad di lanta su yiu y e problemanan cu e por enfrenta te na momento cu esaki tin12 aña. Mama y yiu a bira lid di “hungateca” na Biblioteca di San Nicolas atravez di e programa pa asina di un manera structura y facil por presta coi hunga pa su yiu.
Jiomary Orman (24) a elogia e division na unda a siña obra di man, y traha e.o. badeau, reki pa colga accesorio.
E Mama Marjory Habibe (22) aña di edad, ta papia di Mr Willems cu a duna nan les di cushinamento, algo cu ta di vital importancia pa implementa den practica como Mama Hoben.
Como persona e ta evalua e importancia di e programa “From Teenage Mother to Life Coach” organisa pa ADRA, Advantace Development Relief Agency 2009 cu ta haci proyectonan na beneficio di esunnan menos afortuna.
Michella Steenvoorde Laclé, e motor tras di e “Plan pa Mayor Obligatorio” ta splica cu e “Plan pa Mayor Obligatorio” por wordo implementa como anexo den e programa programa aki den su totalidad pa asina brinda e mamanan hoben un tool mas pa structura e crianza di nan yiunan.
“Un pabien y palabra di aprecio ta bay na Alcidia Janssen Richardson, directora di ADRA ARUBA y su team, cu e programa precioso “From Teenage Mothers to Life Coaches”, na unda ta duna e mamanan teenager un segundo oportunidad.” Michella ta vocifera.
Si e Mama hoben no a termina su scol, e ta haya e oportunidad door di ta activamente inclui den solucionnan pa logra esaki y despues ta prepara pa haya un bon trabao. Emocionnan y circumstancianan NO ta forma un estorbo asina den e hoben su bida. E por enfrenta mucho mas como mama hoben. Algo di aprecia.