PARIS, Francia – E ex presidente di UEFA ta deteni den e municipio Parisino di Nanterres. E ex minister di Interior di Sarkozy, Claude Gueant, tambe ta deteni.
Platini, considera como un di e figuranan mas grandi di futbol mundial durante e decada di 1980, a wordo deteni como parti di un investigacion tumando luga riba presunto fraude den e votacion caminda cu Qatar a obtene e derechonan pa organisa Mundial di 2022. Le Monde a informa cu e investigacion a pidi door di e oficina di e fisca nacional di finanza, pa actonan di soborno activo y pasivo”.
E ex Minister di Interior Frances di 2011 pa 2012 bou di e presidencia di Sarkozy, Claude Guéant, tambe a wordo deteni como tambe Sophie Dion, ex consehero di e ex presidente Frances. Platini ya caba a wordo retira for di cargonan internacional, sanciona cu cuater aña di suspension pa TAS pa cobra un pago di 1.8 miyon euro , di manera ilegal. E pago tabata procedente di Joseph Blatter, presidente di FIFA e tempo ey.
Qatargate cu a sacudi FIFA
Dia 3 di december 2010, e dia despues di cu duna Qatar e derecho di organisa Mundial, prensa Britanico a saca na claridad pruebanan pa demostra cu varios miembro di FIFA a wordo soborna. Varios investigacion hudicial despues a señala diferente lidernan di e federacionnan.
Na mei 2014, den un entrevista na television Suizo, Blatter a splica cu e eleccion di Qatar pa e organisacion di e mundial 2022 “tabata boluntad politico, tanto na Francia como na Alemania. E principal empresanan Frances y Aleman ta operando na Qatar”, Blatter a splica.