Pa Serlimar traha hunto cu Cuerpo Policial y City Inspector ta importante pa yuda e barionan keda limpi. Michael Raymond, operations manager di Serlimar a splica cu e proyecto aki ta pa deshaci di autonan bieu, frigidaire, stof, y otro obhetonan cu ta den bario y tambe den mondi. Prome cu Serlimar por deshaci di stof, frigidaire y otro obhetonan den medio ambiente of den barionan, lo pidi un afstandverklaring cu ta bin of di Bureau City Inspector of di Polis. E afstandverklaring ta unda cu e persona, e doño di e obheto ta renuncia na e obheto oficialmente y Serlimar lo presenta na e sitio, deshaci di dje y hib’e Parkietenbos, unda cu esaki lo wordo gecrushed. E lo wordo machica. Serlimar ta haciendo e proyecto aki como parti di nan Corporate Social Responability cu ta para den nan mision y vision y tambe pa Serlimar ta hopi importante pa medio ambiente y e higiena di nos barionan. Kier urgi tur ciudadano, tur hende pa haci bon uzo di e proyecto aki. E proyecto aki lo costa Serlimar basta recurso, qua personal, qua material y naturalmente placa. Ban haci bon uzo di e proyecto aki y ta look forward pa traha cu Bureau City Inspector y naturalmente Cuerpo Policial, segun Raymond.
No tin ningun beneficio pa Serlimar, manera e vision y mision ta bisa, cu e meta ta pa mantene Aruba limpi, e barionan limpi y nos medio ambiente limpi.