Manera ta un gran tradicion, ta finalisa aña cu un celebracion grandi pa tur empleado yamando nan danki pa e forma con a traha pa e organisacion. Ta danki na nan esfuerso y dedicacion, cu Hospital a crece pa loke ta e calidad di cuido y servicio cu ta brinda na tur cu ta haci uzo di Hospital, sea clinico of policlinico. Tabata un aña yena di reto, specialmente cu e construccion andando, pero di cual a logra cumpli cu mayoria meta fiha.
Charlaine Alexander-Huntington a bisa cu aña 2016 tabata un aña unda e edificionan a bay halto. “Nos ta mey mey di construccion. Di pafo ta mira cosnan nobo. Pa e empleadonan mes, e por tabatin algun inconveniencia, manera stof na pia di trabou cu algun hende no por contra dje”, asina e manager di departamento di Comunicacion y Informacion a vocifera.
“Pa e empleadonan mes e tabata un aña tiki dificil en conexion cu e construccion, pero nos ta asina positivo pasobra pa otro aña poco poco tur cos ta biniendo cla. Nos ta bayendo den un fase nobo cu edificio nobo. Aunke ta bay tin reconstruccion den esun actual, pero tin algo nobo na caminda pues sigur cosnan positivo nos dilanti”, asina Charlaine Alexander-Huntington a splica.
Aña 2016 tabatin proyectonan hopi grandi andando, cu lo influencia Hospitaal completo. Ta papia di e digitalisacion di e dossier di pashentnan. “E ta un cambio gigantesco pa e trahadonan mes, pues mirando cu ta bay di traha cu papel pa e stap completamente digitaal, pero pa e pashent esaki kiermen mas calidad di servicio mirando e eficiencia cu e lo bay trece cune”, el a agrega. Tur informacion lo ta digitalisa y asina ta haci’e mas facil manera un, dos, tres pa yega na tur informacion di e pashent “esey mi ta kere ta hopi importante pa tur hende ey’fo sa. Hospital ta traha tur dia riba mehora servicio. Tin hopi cos ta sosode tras di cortina, pero nos ta sigui traha duro teniendo semper e pashent su bienestar den mente.”
Finalisando el a bisa cu durante e anochi di celebracion di fin di aña magico a saca empleado di aña 2016 cu a resulta den persona di Michael Brouwer, kende ta traha den e departamento di IT.
“Nos sistema ta un poco diferente pasobra tur empleado por scoge e empleado di aña pa medio di un voto. Prome nos ta nombra empleadonan di luna pa 12 luna y despues tur coleganan por vota ken pa nan mester bira e empleado di aña”, di acuerdo cu splicacion di Charlaine Alexander-Huntington. “Esaki ta algo hopi great cu bo mesun coleganan ta sostene’bo pa bira empleado di aña. Pabien Michael,” el a finalisa bisando..
E anochi magico a sigui yen di ambiente cu musica di e banda di momento, Buleria!