Sra. Meverly Romano, vocero di Departamento di Impuesto, ta splica ariba e ultimo desaroyonan di pago di number di auto y kico ta e plannan pa 2018. E ta splica.
Te cu December, 5 mil cliente a haci nan pago pa number di auto 2018. E prome siman di Januari tabata basta druk na Departamento di Impuesto. Hopi ta pensa cu nan no kier cay den e drukte pisa di fin di luna, ya cu e ley a cambia. Awo e deadline no ta 15 di Februari mas, pero el a bira 31 di Januari. Esey ta haci cu e chauffeurnan ta basta consciente di esey y esaki ta haci cu ta bira druk na DIMP, pa nan paga nan number.
Tambe Sra. Romano kier a encurasha pa clientenan haci nan pagonan di number di auto na banconan local. Departamento di Impuesto y banconan local a yega na un areglo, caminda cu nan ta haci nan sistema automatisa un poco mas miho, di tal manera cu e ta haci e pagonan di number di auto mas facil. Departamento di Impuesto a ricibi bon cooperacion di e banconan pa esey. P’esey kier a encurasha e clientenan cu no tin mucho tempo pa bay para warda pa nan yega na turno pa por paga nan number di auto, nan por haci esaki online. Solamente esunnan cu ta paga via banco por busca nan sticker despues di 5 dia di trabao, na e balie di fastlane na e oficina principal. E personal disponibel lo controla e seguro y si esey ta na ordo, e cliente lo ricibi nan sticker y recibo.
Pa loke ta e falsificacion di e stickernan, a keda demostra cu falsificacion di sticker ta mas facil cu plachi di number, Sra. Romano a splica cu e stickernan ta en berdad facil pa falsifica y esey tambe Departamento di Impuesto a ripara. Directora di Departamento di Impuesto a bisa di lo entrega denuncia na polis pa e casonan aki. E no ta bay solamente pa e stickernan chikito cu ta plak ariba windshield ta wordo falsifica, pero tambe hopi cliente ta core cu sticker pa number di auto, cual tampoco ta permitibel. Esey ta algo cu tin completo atencion di Departamento di Impuesto, y ta den man di directora pa haci denuncia na polis pa esunnan cu ta presta nan mes pa haci e actonan aki, cu ta completamente ilegal.
Pa loke ta trata e futuro, Departamento di Impuesto ta bezig internamente pa wak con ta e miho manera pa introduci plachinan duradero, lo mester keda toch cu sticker. Pero nan mester bin cu otro tipo di sticker cu ta hopi mas dificil pa falsifica. Pa ley e auto mester tin un number ariba dje.
Antes tabata asina cu e number tabata sirbi como registro di auto, pero tambe como bewijs cu e persona a paga su belasting. Aworaki e sticker ta bira comprobante di pago. E stickernan actual ta wordo falsifica tambe y e polis, ora cu e para e automobilista, e ta pidi’e tambe e recibo cu e cliente a haya di Departamento di Impuesto, pa wak si berdaderamente e belasting ta paga. Esey ta encera cu polis tin cu dedica mas tempo na cada control di auto cu e haci ariba caya. Pero esey ta loke Departamento di Impuesto kier purba di elimina, door di trece plachinan di number cu chip ariba dje, caminda cu polis por scan e number y di biaha ta haya sa di e ta paga of no. Esaki ta posibilidad cu nan tin, pero naturalmente Departamento di Impuesto tin cu tene deliberacionnan cu gobierno y principalmente minister di Finanza cual ta e miho manera pa introduci un sistema nobo. E sistema actual, den su tempo a funciona bon, pero actualmente tin hopi auto ariba caminda y e ta bira hopi trabao pa controla tur auto. Lo mester bay den direccion moderno y cu ta bira mas eficiente tanto pa Departamento di Impuesto pero tambe pa polis ya cu polis no ta bay tin tempo pa controla tur e autonan, cual lo trece problemanan pa e pagamento di e belasting.
Departamento di Impuesto mester tene cuenta cu presupuesto, ya cu e placa cu tin disponibel lo mester wak si por bin cu plachinan duradero, pa cuanto aña cu lo mester wordo stipula cu e ta keda valido. Hasta e lo mester encera un posibel cambio di ley. P’esey e ta un proyecto hopi grandi, cu no solamente e ta encera ministerio di Finanza, pero tambe cu e ministerio di Husticia cu tambe lo por hunga un rol den henter e proyecto aki, segun Sra. Meverly Romano, vocero di Departamento di Impuesto.