Loke cu Departamento di Impuesto ta preparando awor aki, ta pa otorga e formulario di declaracion di Inkomstenbelasting di 2015. Esey tin basta cliente cu ta puntrando pa nan y tin cu bisa cu na e momentonan aki a ricibi tur e formularionan caba for di e compania di imprenta, segun vocero di Departamento di Impuesto, Meverly Romano.
Actualmente ta bezig ta plak e labelnan cu datonan personal riba nan. Den e siman cu ta bin lo bay cuminsa hinca nan den envelop pasobra cu e luna di September, nan ta cuminsa bay post. Manera cu nan bay post, lo anuncia esaki den prensa. E fecha oficial di e otorgamento ta dia 1 di October y e deadline e ora pa entreg’e ta dos luna despues, cual ta dia 1 di December. Esey ta e trabao grandi cu Departamento di Impuesto tin awor aki cu ta tumando luga internamente, pasobra ta sacando awor aki rond di 37 mil formulario di declaracion. E ta un trabao hopi grandi, pero ta algo cu ta custuma cun’e caba. Ta algo cu ta sosode tur aña. Loke por bisa awor caba na clientenan pa nan cuminsa prepara nan informacionnan di nan entrada, nan gasto, nan cartanan di banco y asina loke nan ta custuma caba cu nan mester pa nan por yena e formulario, nan por cuminsa colecta tur e documentonan necesario. Aki pronto lo bay ricibi e formulario di declaracion den nan postbus.
Ta bay cuminsa cu e ayudo, manera cu ta haci tur aña. Esaki probablemente lo bira e ultimo siman di e luna di October y e ultimo siman di e luna di November, segun Romano, prome cu mester entrega e declaracion.
Na Camacuri semper ta duna ayudo pa yena formulario. Tin pensa di bay San Nicolas y tambe na Noord, pa brinda ayudo.