Meverly Romano, vocero di Departamento di Impuesto, a comenta cu e siman aki nan lo cuminsa duna servicio na MFA Paradera. Esey ta e edificio nobo di Gobierno, caminda cu ta invita clientenan cu ta custuma di atende nan asuntonan di belasting na e edificio chikito cu tin otro banda di caminda, cu awor aki no ta eynan mas. Awor aki nan ta dunando servicio for di 8’or di mainta te cu 3’or di atardi non-stop na MFA Paradera. Departamento di Impuesto ta invita tur su clientenan pa acudi eynan pa atende nan asuntonan di belasting manera cu nan tin custumber di atende caba. En corto Romano a splica cu e clientenan cu ta acudi na Paradera, por haci pago di tur tipo di belasting.
El a splica tambe cu nan por haci pago pa permisonan di Dimas y tambe pago di por ehempel erfpacht. Algo tambe cu nan por haci eynan ta si nan kier registra un auto, nan por pasa eynan pa haci e parti di registracion. Esnan cu ta entrega nan plachi di number tambe ta posibel pa haci esaki na MFA Paradera y esnan cu ta bin haci pago di number di auto, nan por ricibi na sticker eynan mes tambe for di e cahero.
Ta servicionan cu Departamento di Impuesto tabata duna caba den pasado den e oficina mas chikito. Pero awor aki nan ta ubica den MFA na Paradera y pesey cordialmente ta invita clientenan pa acudi eynan. Esnan di Paradera y tambe esnan di vecindario, cu nan por acudi eynan libremente pa atende cu nan asuntonan fiscal.
E localidad di Paradera tambe ta posibel pa entrega tur luna declaracion di Loonbelasting, BBO, BAZV, y demas declaracionnan cu e clientenan lo mester entrega mensualmente. Tambe ta posibel cu e clientenan por acudi eynan y haci entrega di nan declaracionnan. Kiermen e servicio toch ta basta amplio eynan. Ta spera cu e clientenan por haci bon uzo di e localidad eynan tambe, Romano a bisa por ultimo.