Recientemente Servicio di Impuesto a manda rond di 42 mil formulario di declaracion via post na clientenan, cu tin registra pa Inkomstenbelasting, segun vocero di e departamento, Meverly Romano.
El a sigui splica cu no ta tur persona kisas a ricibi nan declaracion ainda of nan formulario. Den e dianan cu ta sigui nan lo por ricibi’e. Tin di compronde cu post lo ta bezig ainda partiendo e formularionan aki. Tin cu bisa cu e formulario aki ta trata di e declaracion di aña 2015 y su fecha oficial di otorgamento ta 1 di October. Esey ta nifica cu e cliente ta haya dos luna oficialmente manera cu ley ta bisa, pa e por yena y entrega su formulario y e deadline ta bira dia 1 di December proximo pa por entrega e formulario aki.
E aña aki tin un particularidad cu ta trata permiso of peticionnan cu ta ricibi pa prolongacion di termino.
Segun Romano, ley ta duna dos luna pa yena y entrega e formulario. Mita di e cantidad cu ta otorga ta drenta na tempo, pero e otro mita mayoria di e clientenan ta pidi pa un prolongacion di termino. Es decir nan ta entrega un peticion pa haya mas tempo, pa completa e declaracion y asina entrege.
Mirando cu tur aña ta ripara cu e cantidad di peticion cu ta drenta ta asina hopi, por bisa cu riba 15 mil carta di peticion ta drenta. E aña aki gerencia di Departamento di Impuesto a dicidi cu ta bay duna prolongacion di termino, un solo biaha y e ta encera cu e cliente ta ricibi e ora seis luna di tempo extra riba e dos lunanan caba cu ley ta dun’e pa e por entrega su declaracion. Esey ta nifica cu e deadline legal ta dia 1 di December. Si e cliente no ta alcansa pa entrega su declaracion pa dia 1 di December, e tin e ora automaticamente seis luna pa e por completa su declaracion y e deadline ta bira e ora dia 1 di Juni, 2017.
Despues di dia prome di Juni 2017, gerencia di Departamento di Impuesto no ta bay duna mas prolongacion. E prolongacion aki ta conta pa tur persona. E ta valido pa seis luna y durante e temporada di seis luna ta spera cu e cliente e ora a haya suficiente tempo pa e por completa su declaracion y entrege.
Despues di dia 1 di Juni si, loke cu drenta laat, ta bay bin na remarca pa haya un aanmanning y si asina e cliente no cumpli cu e termino cu e aanmanning ta duna, e ora e ta core riesgo di haya un boet, na momento cu e inspector saca su cobransa definitivo. Esey ta un cambio grandi pa e aña aki pa loke ta e aña fiscal 2015 y Romano ta pidi e clientenan pa tene cuenta cu esaki. Kiermen e prolongacion extra di seis luna cu ta wordo duna, ta uno automatico. E ta conta pa tur cliente cu no ta alcansa pa entrega nan declaracion pa dia 1 di December. E ta nifica cu e cliente no tin mester di entrega un carta di peticion manera ta e caso den pasado. E ta haya su prolongacion di termino pa un periodo di seis luna.