E sistema aki ta un back up cu a bin hunto cu e sistema grandi nobo di observacion di METEO cu ta premira cu lo wordo instala den comienso di 2018. Manera por corda, na aña 2015 METEO a encontra cu problemanan di su aparatonan riba pista di aeropuerto unda mayoria di avionnan Mericano cu si tin siguridad di nan pasaheronan na pecho a cancela vuelonan pa Aruba door di falta di datonan Meteorologico.
Desde di e temporada ei METEO ta bezig cu gobierno pa obtene aparatonan nobo di observacion y un RADAR.
Relaciona cu e aparato di observacion nos ta asina leu cu por instala esun nobo den 2018.
Ultimo lunanan METEO a encontra diferente problemanan cu su aparatonan Meteorologico na aeropuerto.
Esaki a bin principalmente door di lamper y biehes di e aparatonan. Pa evita cu lo haya atrobe confronta cu no tin datonan Meteorologico cu ta inclui observacion y pronosticonan pa avion, a opta pa instala un sistema sofistica militar temporal. Esaki lo keda funciona banda di e otro dos sistemanan meteorologico bieu na aeropuerto.
E sistema temporal aki ta midi biento, temperatura, humedad, presion atmosferico, awasero, visibilidad, haltura y cantidad di nubia, tipo di weer y actividad di lamper. E sistema ta traha e observacionnan automatico, y unda si ta necesario e observador di tempo por edit e observacion tambe.
Relaciona cu e sistemanan bieu METEO lo busca di drechanan.
Riba e potretnan por haya un idea di e sistema militar temporal. Manera a indica caba ta premira cu e sistema grandi nobo lo drenta den funcion den 2018.