Meta principal di Fundacion Sea Bunita Sea Bo Mes ta inclusion di nos hendenan special

0

Hans Geerman a crea un comision cu e meta di mehora e calidad di bida di personanan cu limitacion fisico y mental, pa cual Sr. Geerman ta splica.

Un tempo e tema aki tabata taboe pero awo pero bisa e tema ta yegando caminda cu e mester yega. Esey ta e lucha pa inclusion. Sr. Geerman ta presidente di Fundacion Sea Bunita, Sea Bo Mes y for di momento cu e organisacion aki a keda funda, e meta principal ta inclusion. Inclusion ta un area hopi amplio y e ta bay ariba tur nivel, e ta bay ariba e ciclo di bida di un persona special, persona cu limitacion. E ta bay for di momento cu e mucha a nace, y e ta desaroya den un mucha/hoben pa bira adulto y ta papiando di inclusion for di momento cu e nace. For di momento cu por bisa cu el a cuminsa su ciclo di bida.

Ora cu ta papia di inclusion, e ta cu e ta wordo acepta, inclui ariba tur nivel di bida den un comunidad. E no por wordo exclui di nada. E mester pro tin e mesun derecho cu un persona tipico. Ora ta papia tocante un persona tipico, ta referi na un persona regular. No ta papia den e terminologia di un persona normal, pasobra e ora lo mester bisa e persona special, ta un persona abnormal. P’esey ta papia di persona regular/tipico y persona special, persona cu cierto limitacion. Ora ta papia di persona cu limitacion, ta papia di persona cu Down Syndroom, un persona cu Autismo, personanan cu tin limitacion fisico, kisas e por ta su pia, e por ta su brasa. Por papia di personanan visualmente incapacita, personanan cu limitacion mental, etc. E ta un base hopi amplio y Fundacion Sea Bunita Sea Bo Mes, ta representa tur e personanan aki. Cu esaki kiermen, cu ta luchando pa nan, pa nan wordo inclui den tur aspecto den comunidad, den sociedad. Cuminsando for di momento, cu e tin cu haya su tratamento, pasobra el a sali como un persona special, te ora cu e desaroya den un mucha cu ta bay den un crèche, un kleuter, despues scol basico, pa un scol special avansa. Sr. Geerman a splica cu un scol basico of un MAVO. E personanan aki por, nan tin habilidad, nan tin inteligencia pero ta simplemente nan mester haya e asistencia pa desaroya esaki. Esey ta loke Fundacion Sea Bunita Sea Bo Mes ta trahando ariba dje.

Nan tin como 4 aña ta luchando pa esaki. Y por bisa cu e lucha ta wordo corona na momento cu Prome Minister a dicidi di institui un comision cu lo bay traha specialmente ariba e area aki, cu ta di inclusion di tur personanan special, cu limitacion. Y den tur aspecto.

Tin un comision cu Prome Minister a institui y ta spera cu e comision aki por yega asina leu cu por traha ariba e diferente aspectonan, maneho, ley, etc., cu caminda cu e hendenan aki, e personanan special aki, por wordo inclui den tur aspecto den nos comunidad.

Sr. Geerman a sigui bisa cu ta papiando di ciclo di bida y ora papia di ciclo di bida, ta cuminsa for di nacemento, sigui pa desaroyo pa su formacion, pa despues bay den su desaroyo pa un persona activo den comunidad, caminda e por traha, por produci y gana su propio salario, y tin su mesun cas. Esey ta e aspectonan cu e fundacion a stipula caba, cu tin cu traha ariba e parti di ciclo di bida, loke cu e fundacion kier concentra cun’e, ariba un termino cortico ta ariba su formacion. Dus e ta haya su enseñansa y su educacion, e personanan aki mester por haya e formacion caminda cu nan por papia normal, mescos cu tur otro hende. Nan mester por haya e formacion unda cu mañan nan por funciona den comunidad, p.e. lesa y skirbi. Nan por traha ariba computer, nan por studia pa un profesion, pa tin un ofishi. Esey ta e faceta cu e fundacion ta trahando ariba dje. Por bisa cu ya caba ta den orientacion y ta spera ariba un termino cortico pa realmente pone tur cos den su faceta pa por traha ariba dje.

Pero e tres puntonan mas importante den e caso aki, segun Sr. Geerman, ta caminda cu ta traha ariba nan formacion, nan desaroyo. For di momento cu nan nace te ora cu nan ta drenta den e parti caminda di enseñansa. Esey awo ta prioridad di e Fundacion, pasobra cu despues e personanan aki ta haya un formacion, caminda cu despues nan por bira activo den comunidad. Dus aworaki pa e fundacion, ta educacion , formacion, di eynan tin cu traha ariba e parti di ofishi, caminda cu nan por haya un desaroyo den un scol di ofishi. Esaki ta pa personanan cu por bisa cu ya caba ta den un edad hoben camidna cu toch nan por desaroya nan mes ta haya un ofishi y e dia di mañan nan ta trahando y ganando nan mesun salario. Esakinan ta e aspectonan mas importante aworaki.

Y pa loke ta e parti di adulto, unda cu nan ta personanan ta den edad, nan ta avansando, lo tin di wak pa nan tambe haya cierto asistencia y desaroyo. Pero lo mas importante ta, caminda cu nan por haya acceso na cualkier caminda cu nan tin dificultad pa haya acceso pa motibo di nan limitacion. E ora mester percura pa nan haya acceso, mescos cu tur otro persona regular y tipico, segun Sr. Hans Geerman, director di Fundacion Sea Bunita Sea Bo Mes.

Comments

comments