Durante di un conferencia di Prensa hunto cu Cuerpo Policial y DIP cu ta forma parti di e Task Force di Beach Policy a presenta resultado di con e control a bay durante fin di siman. Importante pa remarca ta cu e Task Force no tey pa para operacion of kita permiso sin mas, sino control y verifica cu cada persona ta cumpliendo cu rekisitonan stpula den nan permiso y e Beach Policy.
‘E unico tarea cu e Task Force a ehecuta den fin di siman tabata pa percura cu tur persona tin nan permiso na ordo y cu nan ta cumpli cu locual cu ta stipula den esaki. Tur hende a wordo bishita, cu di un of otro forma ta opera riba nos beachnan. E Task Force lo percura pa sigui controla y percura pa ehecucion di Beach Policy cu a drenta na vigor desde 2014.’
A duna mayoria di esnan cu a bishita un advertencia y oportunidad pa proximo biaha nan tin nan papelnan na ordo. Durante hopi aña a purba trece ordo y respet riba nos beachnan y na diferente ocasion Cuerpo Policial, DIP y Directie Scheepvaart a intermedia tambe, lamentablemente e trabou di control no tabata ricibi suficiente sosten di e Gobierno e tempo ey. Pesey recientemente 4 Minister a pone esaki como prioridad y a tuma e decision pa cera un Decreto Ministerial caminda cu ta apodera e departamentonan pa actua.
E colaboracion di departamentonan ta esencial si kier yega na soluciona e problemanan cu sa tin riba nos beachnan den forma structural. Por ehempel mirando cu Cuerpo Policial no ta dispone di tur e informacion di e permisonan di cada persona. ta confronta e reto aki ora cu mester actua. Considerando esaki, a base di con e proceso di colaboracion di e diferente departamentonan manera KPA, DIP, DOW y Directie Scheepvaart a bay, por bisa cu e prome accion tabata uno exitoso.