Durante aña escolar 2015-2016 a introduci Kerndoelen pa prome biaha specificamente pa e materia di Rekenen Wiskunde. Pa hopi aña a papia riba introduci loke ta wordo yama e metodonan nucleo y cu tin di haber cu loke kier pa tur mucha di cualkier scol sa na diferente periodo durante scol basico.
Minister di Enseñansa, Michelle Hooyboer-Winklaar a duna di conoce cu “kerndoelen” ta trata di loke e mucha mester sa prome cu nan bay scol secundario. Pa medio di Kerndoelen ta establece esaki y loke a trece ta un programa di por train e maestronan riba e diferente aspectonan pa por introduci esaki.
Aña pasa e metodo aki a wordo introduci na tur scol basico na Aruba y a trece cune un aire hopi positivo ya cu por wak cu e tin su resultadonan. “E maestronan ta comprende den ki direccion mester bay pasobra ta un doel, nos kier yega na esaki”, e minister a señala.No ta solamente un test, sino a manera con ta bay logra pa e studiantenan capta y domina e vak Rekenen Wiskunde.
E aña aki a sigui inverti y a trece e mesun compania cu a haci e implementacion aña pasa conhuntamente cu Ministerio y Departamento di Enseñansa pa bay mas den profundidad, refresca e memoria y yuda surpasa cualkier obstaculo cu e maestronan por ta pasando.
Minister Hooyboer-Winklaar a agrega cu loke tambe nan a haci ta introduci esaki specialmente pa nos scolnan special cu tin diferente meta compara cu scolnan basico. Esaki ta a base di e vision cu scolnan special tin e mesun importancia cu scolnan regular y cu kier saca lo maximo for di cada studiante. E manera pa por yega na esey ta e introduccion di e kerndoelen y cu training pa e maestronan con pa haci esaki, con pa anda cun’e y saca e maximo di e studiantenan, e mandatario a remarca.
Durante e training a pasa den e diferente salanan y a wak cu e teamnan di cada scol ta asina entusiasma y nan kier domina esaki pa por yuda nan studiantenan ta exitoso.
Minister di Enseñansa a indica cu lo keda traha riba e profesionalizacion di e maestronan. Lo yuda nan reenforsa nan habilidadnan den transcurso di aña. Esey ta loke ta haciendo for di 2014 caba y lo sigui haci esey cu diferente charla y enfoke riba diferente tema.