Director di Directie Scheepvaart, Sr. Carlyle de Coteau, a splica cu pronto, un carta lo bay sali pa minister di Transporte y Husticia pa busca un solucion pa e tema di beach policy. Esaki ta pa wak ki dia lo cuminsa traha hunto cu otro departamentonan pa drecha e situacion dilanti hotelnan, pa pone esaki den funcion.
Directie Scheepvaart mes ta pensando, como un ekipo dedica pa esaki y si logra haya esaki, esey lo contribui sigur sigur pa un beach mas sigur. No ta necesario pa bin cu departamento nobo,. sino mester traha ariba union di tur departamento. Nunca a pone un fecha, cu e dia lo cuminsa enforsa e ley di beach policy, ya cu esey ta depende di Minister di Transporte y di Husticia, kisas e Ministerraad por tuma un decision ariba esey.
Directie Scheepvaart ta dispuesto pa duna su cooperacion, pero mester haya aprobacion ya cu oranan di trabao y pone hendenan disponibel, y esaki ta costa placa. Manera cu haya e aprobacion, mesora lo implementa esaki ariba e beachnan. Te ainda tin hende cu no ta cumpliendo cu e reglanan.
Cierto cosnan cu na Directie Scheepvaart por handle, ora cu e companianan ta bin renoba nan vaarvergunning y nan sigur no ta na ordo. Algun dia pasa, un di e inspectornan a puntra un di e compania di watersport pa e seguro y e persona aki a saca seguro di auto duna e inspector. Loke hopi hende no ta compronde ta cu e boto mester un seguro apart. Cosnan asina no ta rekeri presencia di polis, ya cu Directie Scheepvaart mes ta handle esaki. E compania en cuestion lo haya un waarschuwing y si esaki sosode dos biaha, e chance ta grandi cu Directie Scheepvaart lo trek in su vergunning te ora cu su papelnan ta completamente na ordo.