Mester tin un responsabel pa tur e desasternan den Infrastructura

Si mira e desaster di Watty Vos Boulevard, e desaster na hospital, a bira tempo pa mira kende mester bay para responsabel pa esaki nan.

Minister encarga cu Infrastructura Sr. Otmar Oduber ta bisa, gobierno no ta contento at all e forma con e trabou ta bayendo cu Watty Vos Boulevard y a notifica director di DOW di esaki. E proyecto ta un contracto cu e gobierno anterior a cera cu e contratista. Segun Minister Oduber, el a bisa hopi biaha cu tin hopi les pa siña, y ta referi na e forma con e PPP proyectonan a ser cera y con nan a ser cera. Un contracto cera cu henter e proyecto ta un proyecto, esey kiermen cu e contratista tin dos aña y mei pa traha riba henter e proyecto y entrega e proyecto. E proyecto aki no a bay den fase, unda ta caba cu un parti, entrega esaki y despues ta sigui cu otro fase. Awor aki ta parce cu ta un campo di bataya tin tur rond di Aruba, pasobra tur caminda tin construccion y tur caminda tin santo.

Minister Oduber ta spera cu ora e producto keda entrega, e lo ta un bon producto y ta bay alivia e trafico grandemente pa Aruba. Pero e realidad ta, cu e situacion actual no ta esun mas desea pa comunidad. E situacion awor no ta nada comodo y lamentablemente no por haci mucho. DOW ta na altura di e situacion, pasobra ta wak den direccion di DOW como cu DOW tin den su man pa hacie miho. Lamentablemente e situacion ta causando hopi dolor na hopi comercio mescos cu tabata e caso di Green Corridor. E tempo ey hopi compania a bay failliet y algun cu ta cerando pasobra no a tuma den consideracion e forma di hiba negoshi. Den caso di Watty Vos Boulevard ta mesun cos pasobra e forma cu a cera e contracto. Minister Oduber ta haya cu DOW mester asumi su responsabilidad pa controla den nomber di pais Aruba si e contratista ta haci e trabou bon pasobra si tin pregunta ta puntra Mota-Engil directamente pasobra nan ta responsabel pa e construccion. DOW t’ey pa percura pa notula, documenta y mustra e hendenan ora cosnan no ta bay bon. Hopi por a mira cu e rotonde banda di Codemsa y otronan tin hopi awa ta para eynan cu ta crea un situacion hopi fastioso y no comodo.

Mester lesa e contracto bon pa mira unda por pone e contratista responsabel. Te cu awor ta parce cu DOW ta funciona como un PR of como un partner den e caso aki. Esey no ta e contracto, e contracto ta, cu a contrata un contratista y e mester a percura pa cumpli. Pero lamentablemente e contracto cu a cera no ta duna mucho espacio pa mehora e calidad di e proceso di e trabou cu ta tumando luga na e momento aki. Segun Minister Otmar Oduber, practicamente gobierno su man ta mara pa e contracto ey. Ta te ora cu entrega e trabou na fin di otro aña e ora ey por bisa cu ta bin boeteclausule of e trabou no ta bon. Lamentablemente a firma contractonan cu no tabatin conocemento pa nan na Aruba. Pa loke ta e situacion di hospital, no a percura pa ekipa e departamentonan manera mester ta. Segun Minister Oduber, e sa cu tin un miembro di minister di Infrastructura anterior cu tabata forma parti di e bouwcommissie di hospital. E persona aki lo bay haya un carta pa e trece tur documento y pone minister Oduber na altura di e situacion cu tin na hospital. Na final di dia ta placa di pueblo ta bay pa paga e proyectonan aki. Si mira e desaster cu tin na hospital na e momento aki y si mira e desaster den e proceso di e trabounan cu ta tumando luga na Watty Vos Boulevard, ta yega un momento pa mira kende ta responsabilisa pa esakinan segun Minister Otmar Oduber.

Comments

comments