FADA a duna di conoce cu situacion actual ta pone cu mas persona ta busca cosnan pa haci. Esey ta ocaciona cu mas caso ta bin dilanti cu uso di alcohol, tambe caso di uso di substancia ilegal ta hunga un rol.
Rulienne Arends, trahado preventivo di FADA a amplia cu recientemente a tuma nota cu e uso di alcohol ta halto y mas caso ta bin dilanti cu violencia domestico. Nan ta wak e factor e uso di alcohol ta ‘hunga un rol grandi’ y uso di substancia ilegal, manera marihuana, cocaine, xtc.
Sinembargo Arends ta comparti cu no ta algo cu ta sucede na Aruba so, pero tin bastante caso na Merca, Australia cu ta paisnan cu ta keda leu pero ta pasando den mesun situacion.
E ta bisa aparte di virus tin cu corda efecto cu ta bay bin cune manera e perdida di economia pa turismo. Nan ta compronde cu uso di alcohol por kita nan stress. Nan sa cu hende ta preocupa pa e virus y kico tur ta bay pasa cu nan entrada, cu nan yiunan cu ta haci mas dificil pa compronde nan les of cu tin mayornan mester bay yuda nan sin nan mes compronde.
Arends ta bisa cu ta varios factor ta hunga rol. Nan mester ta consciente cu e uso di substancia legal of ilegal cu nan ta usa pa lubida nan problema. Pero mester corda cu e situacion ta pa un tempo y cosnan lo cambia.
Por trece tambe consecuencia cu esnan cu tabata recuperando di un adicion ‘e por ta un caida pa nan’. Arends ta bisa cu tur locual ta pasando por tin un efecto riba nan. “Nos ta bisa tur hende y manera minister president a bisa un biña un bes pa relaha bo mes ta bon pero no mantene asina y no lag’e bira un custumber negativo y trece consecuencia cu lo ta dificil pa laga los y despues lo yega na punto di usa substancia ilegal den e temporada actual”, el a bisa