Mester stop di tira sushi den nos damnan cual ta perhudica nos cunukeronan

Manera ta custumber di Bureau City Inspector, tur aña nan ta controla tanto dam cu rooi rond Aruba, mirando cu ultimo temponan aki nos tabata tin hopi problema den loke ta e damnan, caminda cu sushi ta wordo tira rond di e dam, y hende tambe cu ta manda awa di pos den e damnan, y manda tubonan pa e dam pa asina no haya gasto riba posnan. Y sigur conhuntamente cu Santa Rosa, City Inspector ta manda tur e informacionnan aki pa nan por controla tambe mirando cu nan ta esunnan encarga cu dam aki na Aruba.

E dam di Tanki Flip por ehempel a wordo afecta hopi caminda cu awanan di pos a wordo manda den dje, y ya caba Santa Rosa a tuma esaki over y haci e limpi. Tabata tin sushi, bestia morto tira den dje tambe, cual tur a wordo resolve na Tanki Flip.

City Inspector por a constata tambe cu e dam di Hooiberg na st. Cruz, na Sabana Grandi y esun di Tanki Leendert, y den su totalidad “nos por bisa cu mayoria di e damnan na Aruba sushi ta wordo tira”, segun Robby Rosel, vocero na Bureau City Inspector ta conta Masnoticia.

#Entrevista Tiramento di sushi den dam y rooi ta perhudica nos cunukeronan

Posted by MasNoticia.com on Monday, October 12, 2020

Esun cu ta haya mas sla di sushedad ta esun di Hooiberg, caminda tur tipo di desperdicio ta wordo tira rond di e dam aki, y tambe parti pafo di e dam. Santa Rosa hunto cu City Inspector tambe ta wordo controla constantemente. Piedra a wordo poni pa stop hende di tira sushi, pero tog hende ta baha for di nan auto bay tira sushi akinan. “Mi ta kere nos como bon Rubiano nos tin cu mantene nos damnan limpi pasobra esaki ta awa pa e cunukeronan por haya pa nan por planta, y sigur pa haya cosecha pa Aruba pa nan come y tin pa bende”, sr. Rosel ta expresa.

Bureau City Inspector ta sigura cu e damnan ta wordo protehi di nan parti y Santa Rosa cu tambe ta haciendo e bon trabao aki.

Borchi pa damnan
Tin riba plan pa pone borchi manera por ehempel borchinan cu a wordo poni na Franse Pas, na unda cu conhuntamente cu e departamento Parke Nacional Arikok a yega na un areglo pa pone borchi na otro barionan manera tambe banda di e damnan pa asina por evita e sushedadnan aki. E borchinan aki ta adecuado, pero tog bo ta haya cierto hendenan cu ta inconsciente cu tog ta bay yega na tira e sushinan akinan. Bureau City Inspector ta manda palabra pa nos comunidad pa mantene nos damnan limpi, no tira sushi ni bestia morto na bienestar di nos cunukeronan pa nos por tin cosecha. “Ban traha segun e reglanan di Santa Rosa pa mantene e damnan aki limpi, y pa no tur tipo di hende por yega pa tuma e awanan aki na e damnan, pa asina por yega na Santa Rosa y haci bo peticion di awa pa haya esaki entrega te na bo lugar.” Sr. Rosel ta enfatisa cu tambe ta pidi pa mantene nos rooinan limpi cu ta core bay unda nos damnan ta. Sushedad den rooi tambe ta pega, despues cu esaki pega, nada por wordo haci.

Si tin ciudadano cu ta mira sushedad tira den e rooinan, por fabor tuma contacto cu Bureau City Inspector riba 582 9777 pa nan manda patruya pa controla y geef door na DOW pa haci limpiesa, pa asina cada canal di dam ta habri pa ora yobida di awa. Nos tabata tin un siman atras cu hopi awasero pero mayoria di dam cu a wordo controla caba tur a core bon, tur a wordo haci limpi pa DOW y solamente ta keda awor esunnan cu falta pa haci limpi.

Comments

comments