Nos por a scucha Minister President papia cu a habitantenan di Parkietenbos, primintiendo nan cu e lo cera e dump. Pero, manera a bira un custumber caba, Minister President ta hunga un wega di contradeci su mes pasobra ora cu e papia cu e trahadornan di Serlimar, e ta bisa cu e no lo bay sera dump, segun parlamentario Chris Romero di MEP.
Apesar di tin dos Minister di medio ambiente y un Minister President cu a papia asina hopi riba medio ambiente pero a haci asina poco, cu e resultado cu e habitantenan di Parkietenbos ta fada, y ya no ta kere mas den e promesanan di Gobierno.
E molester cu e vecindario aki tin pa varios aña caba cu huma, musca y e trucknan, ta inimaginabel.
Solamente pensa si abo lo tin un dump den bo bario, con lo bo sintibo si bo ta bibando un situacion asina.
Teniendo na cuenta e situacion precario cu e habitantenan di Parkietenbos ta biba, awe mi bin cu un plan structura di kico MEP lo haci pa mehora e problema, aki unabes den nos drenta Gobierno.
E prioridad number uno lo ta pa paga e candela definitivamente, manera MEP a haci caba antes. E biaha aki lo instala tubonan necesario pa saca e gas cu tin den e sero y flair esaki na un manera mas responsabel.
Lo inverti y educa pa separa desperdicionan for di otro. Nos mester cuminsa reduci, recicla of reuza gran parti di e desperdicio pa asina tin menos sushi bayendo direccion di dump. Y si e miho opcion ta pa inverti den e planta eynan pa por reduci e sushi cu ya caba ta riba dump, nos lo haci esaki tambe.
E vision di MEP ta pa Aruba bira un “zero waste community” y si ta necesario pa nos tin un landfill moderno, e mester cumpli cu tur exigencianan internacional.
Un cos si, nos ta sigur, cu mester sanea full e area aki. E impacto ambiental y contaminacion cu tin awo, ta algo cu nos no por permiti mas ariba nos isla.