DIMAS tin un sistema pa pago cu clientenan mester haci ora di entrega di peticion. Ta bin pa tur cliene cumpli cu e procedura manera cu ta pidi, ya cu de lo contrario e por causa retraso den procesamento di e peticion. Esaki Marilyn Wout, relacionista publico di DIMAS, a bisa den un entrevista.
Ta pidi clientenan pa haci e pago segun instruccionnan, cual ta via Online Bill Payment di Aruba Bank of Banco di Caribe. Of tambe por haci esaki na un di e MFA-nan. “Lamentablemente nos ta haya hopi dificultd pasobra e hendenan ta opta pa paga di un forma diferente. Hopi ta prefera di bay paga na un cahero di banco y e placa ta bay riba un cuenta cu no ta por wordo controla. Por lo tanto no ta “clear” e pago door di Departamento di Impuesto. E consecuencia ta cu e pago ta cana pa e siguiente fase di procesamento. E ta keda pega, te ora cu e cliente reclama cu su peticion ta tardando demasiado tempo.
Wout a splica cu tur cliente ta haya informacion di e metodo di pago. E ta corda cu aña pasa a cambia e metodo di pago. Tabata paga adelana y despues ta entrega peticion di permiso Na januari, 2020, a dicidi pa cambia pa pago online y na MFA, pa prepara e clientenan pa ora cu bay over na uzo di e portal di DIMAS. Tur pago e ora lo pasa online. Tin cliente cu no ta afilia na ningun di e dos banconan y no ta haci e pago online. Nan ta haya nan mes den problema ora cu e pago no ta yega riba e cuenta concerni. E peticion ta tarda mas di lo necesario. Cu otro banconan, e cuenta no ta activo y no ta pidi pa e codigonan necesario. Impuesto e ora no sa cu e ta un pago pa un permiso of pa ki otro cos.
For di aña pasa a bin ta haci investigacion riba e pagonan aki, unda cu e sistema no ta lesa e detayenan den forma automatico. Y ta tuma hopi tempo pa mira di kende e pagonan ta y pakico.