Diego de Cuba di STA ta comenta cu mester ehecuta e plannan pa recogemento y procesamento di desperdicio y pueblo adapta na e cambionan y wordo educa den mantene Aruba limpi.
STA a reuni cu Minister Otmar Oduber riba e topico di cobramento pa recogemento di desperdicio. Loke ta pasa ta cu na Aruba tin un tendencia por ehempel pa traha un ley, pero e no ta wordo ehecuta ni implemente manera debe ser. Awo Minister a trece diferente medidanan pa maneha e desperdicionan. E ley di cobramento pa recogemento di desperdicio ta un ley cu ta tin pa basta aña caba. Awo nan a yega na un tarifa di 25 florin pa tur hende. Inincialmente tabatin un cantidad di personanan cu lo no mester a paga pa recogemento di sushi y tabatin otronan cu mester a paga un suma di casi 90 florin. Pero awo tur persona lo wordo cobra un solo tarifa pa tur persona. Sr. de Cuba ta sinti cu mester stop di haci wega y tuma un decision concreto pa caba. Mester tin un punto di salida y na caminda nan ta wak con nan ta keda drecha e situacion.
Sr. de Cuba tambe ta comenta tocante su comprension pa cierto pensionadonan cu ta pidi ayudo, pasobra locual nan ta cobra no ta suficiente y esaki por ta un peso extra pa nan. Pero e ta sinti su mes indigna cu e pensionadonan cu ta cobrando dos pensioen y ganando mas placa cu nan tabata gana tempo nan tabata traha, kendenan ta esunnan cu ta gritando mas duro. STA tambe tin e trahadonan di Serlimar na pecho, pasobra e continuacion di e compania ta depende di e pago aki. Sr. de Cuba ta spera cu e plannan aki mester wordo ehecuta.
Ademas, sr. de Cuba ta remarca cu maneho anterior a pone cu e situacion di e dump na Parkietenbos ta den un fase di recuperacion. Tin ora tin decisionnan cu mester tuma cu ta un tiki duro pa cierto personanan, pero e ta necesario pa scapa e situacion. Pueblo mester adapta na e cambionan aki y wordo educa den e parti di reciclahe.
E cuestion di recogemento y procesamento di desperdicio no ta un materia pa Serlimar so, e ta un materia pa henter pueblo cu ta produci desperdicio. Si pueblo kier pa Aruba ta luci den su bunitesa, nan mester por yuda manten’el e limpi.