Diamars atardi a tuma luga un reunion entre Minister Chris Romero y empleadonan di Post NV, ariba e malcontento cu ta reina na Post NV. Tambe e minsiter kier a skucha loke e empleadonan tabata kier a trece dilanti. Sr. Diego de Cuba, di STA ta amplia.
E minister a bin cu’n delegacion di hendenan cu ta traha hunto cun’e na Bureau di Minister y esakinan a tuma debido cuenta cu tur locual e trahadonan a trece dilanti na Post NV. Manera tur hende sa, prome cu e gobierno aki a sinta, tabata tin practicamente 8 aña cu nada lo no a wordo haci pa Post NV. Al contrario, un gran parti di Post NV a wordo poni den man di tercera persona y con por a permiti esaki, durante e gobernacion anterior.
Tambe tabata tin otro situacionnan cu a presenta unda cu STA kier a mira cambio den esaki, unda cu tin NVnan di gobierno ta haciendo uzo di e competencia enbes di haci uzo di Post NV mes.
Pa loke ta e maneho, esaki tambe a bin dilanti. Un 95% di e trahadonan di Post NV ta malcontento cu Post NV. directiva di STA ta conclui un cos, ya cu nan por yama sindicato STA kico cu nan kier, pero si kier drecha e situacion di Post NV, lo mester move e director for di akinan. lo mester bin un reorganisacion sano den Post NV y lo mester bay diversifica Post NV tambe. Opcionnan tin na cantidad, unda cu e mesun trahadonan, cu den nan disertacion a trece dilanti tur e preocupacionnan cu tin.
Ta e trahadonan mes a studia tur e alternativanan cu tin. Mester tene cuenta cu ta bibando den un mundo cibernetico. Email, WhatsApp, etc. Mester bay cu tempo y tin espacio y tin otro negoshinan cu por bin cu nan den Post NV y cu lo duna resultado.
Pa loke ta e edificio, cu ta mustra bunita di pafo, pero e parti paden mester wordo structura di un manera pa e ta mas eficiente. Di e banda aki e trahadonan di rason. Otro tema cu a wordo trata tabata e scooternan nobo.
Si gobierno haci di su parti y trahadonan tambe duna di nan parti, y sindicato keda pusha ariba dje, nan lo yega nan un solucion sigur. No ta prome biaha cu STA ta hay’e den situacionnan fastioso, pero despues ta hala rosea y ta pasa e fase aki.
E gobierno anterior, segun Sr. de Cuba, a laga contractnan firma y e gobierno actual ta cauteloso cu esaki. Mester tene na cuenta cu e gobierno actual no a haya traspaso di nada. Nan mester tene cuenta cu tur e contractnan firma. Y prudentemente mester haci esaki, y si bay corte, nan lo perde e caso tambe.
Den Post NV tin 62 pa 65 punto di atencion cu mester tene cuenta cun’e. Y aki ta un trabao formal cu ta bay tin. Y no ta den Post NV so, pero tambe den Serlimar, Arubus, etc.
Pa otro aña lo mester bin lus na horizonte, gobierno ta bayendo cu reces aki poco tempo. Y gobierno tabata tin tempo suficiente pa haci un inventarisacion, y a pidi un reunion cu caracter di urgencia cu gerencia di Post NV, cu ultimo aki lo kier duna te dia 11 di december y esaki ta inaceptabel. Gerencia sa masha bon cu e situacion no ta mucho bon. Por tin comprension pa motibo cu tin hendenan den exterior. Pero mester por tin un hende cu ta atende cu casonan andando, segun Sr. Diego de Cuba, lider di sindicato STA.