Den un reunion di Parlamento, caminda cu palabra y ofensanan ta wordo tira, respet no ta wordo mustra pa e President di parlamento y esaki no ta un nivel cu ta wordo spera den un Parlamento. Sr. Ricardo Croes, lider di RED ta splica.
Lider di partido RED ta pensa si haci cambio pa cu Parlamento di Aruba. Esey ta un punto sigur. Ora cu bo tin un Parlamentario manera Sr. Rene Herde, cu ta bin dilanti y bisa cu no ta mira motibo pakico mester controla e gobernantenan. Segun Sr. Croes, e unico funcion di un parlamentario ta pa controla nos gobernantenan. Y si no por haci esaki, por wel di keda cas numa. Pero esaki ta conta tambe pa Oposicion tambe, pasobra cu ni cuanto nan bay contra, ni maske nan vota contra toch nan ta den minoria. Asina lo spaar 21 x e salario di e Parlamentario. No tin un efecto di e organo cu yama Parlamento, esta di controla gobierno. Esun cu mester haci esaki, ta bisa abiertamente, cu nan no mester controla gobierno. Y otro nan cu ta protesta no por haci nada, pa motibo cu nan ta minoria.
Partido RED Democratico ta bou di e imprension cu mester haci e cambio pa garantisa cu nunca hamas cu Parlamento di Aruba wordo secuestra pa cualkier gobierno totalitario, cu den historia di Aruba tabata consisti di partido MEP y AVP. Y awe ta papia di un debe externo di 4 biyon florin.
Cambio, segun Sr. Croes ta indispensabel. Presidente di Parlamento mester wordo respeta, e momento ey cu e ta sinta como presidente di parlamento, e mester wordo respeta. Tin reglanan caba cu ta stipula den Parlamento pa comportacion di tur parlamentario, pero nan ta wordo trapa a base di inmunidad pa e parlamentario por expresa su mes na cualkier forma sin cu e ta wordo persigui.
Partido RED ta di acuerdo cu e Parlamentario mester proteccion, pero no pa coba mama di niun hende, no pa yama hende pa nomber. Esaki segun Sr. Croes, no ta un libertad cu mester existi den un nivel di Parlamentario. Na un nivel di un organo di mas halto di Aruba.
Cambionan ta indispensabel. Cu e presidente di Parlamento ta afilia na un partido politico, no ta duna niun parlamentario e derecho di trata cun’e di un forma irespetuoso y ni tampoco tegenover di oposicion. Esaki segun Sr. Ricardo Croes, lider di partido RED Democratico.