Mester actua cu man duro contra ilegalidad

Alan Howell a bin ta alertando pueblo riba e situacion di atraco, igualmente el a bin ta alertando gobierno y pueblo riba kico lo pasa si no bay man duro contra ilegalidad.
Corectamente minister di Husticia a acudi Parlamento pa informa riba e situacion, segun parlamentario di POR a informa, e ta bisa cu cualkier minister di Husticia cu pensa cu e por traha su so, ta full fout bezig, pasobra pa combati criminalidad mester traha conhuntamente cu Parlamento, Ministerio Publico, pueblo, Guarda Nos Costa, Kustwacht, Cuerpo Policial, prensa,etc. y e mandatario actual ta compronde esaki tambe hopi bon. Loke parlamentario Alan Howell ta admira di minister di Husticia actual ta cu e mandatario ta bay Parlamento regularmente pa duna cuenta di con e situacion ta, kico ta su tacticanan cu e ta uzando y kico ta pasando exactamente den Cuerpo Policial.
Segun e datonan presenta pa minister di Husticia, te na e momentonan aki tin 33 atraco na aña 2018, cual ta menos cu aña pasa (44). Mirando e resultado aki, no ta bisa alleluyah, pasobra cada atraco ta dimas. Alan Howell ta presenta e cifranan aki pasobra algo hopi particular ta pasando y ya caba algun tempo atras el a bisa bon cla cu lo bin un cambio den ken ta comete atraconan. Atraconan den pasado tabata wordo cometi principalmente door di nos mesun Arubianonan, pero awo ta trata di stranheronan ilegal, specificamente proveniente di Venezuela. E cantidad di atraconan cometi door di e grupo aki ta surpasa e 50% di e cantidad di atraconan, yegando na un total di 18 di e 33nan cu a tuma lugar e aña aki.
Pesey e ta importante pa tur hende na Aruba compronde cu mester pone ordo na nos pais, Cuerpo Policial, Guarda Nos Costa y Kustwacht ta haciendo un bon trabou, pero mester cooperacion di tur hende.
“Ta presenta e situacion aki no pa bisa cu un minister di Husticia ta miho cu otro, tampoco pa trece miedo den comunidad, pero nos mester ta alerta si, pasobra si nos drumi un cos ta bay pasa nos”, Alan Howell a indica.
Ta pa e motibo aki mes cu un biaha mas el a pone enfasis cu ta importante pa busca cooperacion rato, rato di militarnan pa nos por cera nos fronteranan y evita entrada di mas ilegal pa tene nos pais mas sigur y trankil cu ta posibel.a

Comments

comments