ROSARIO, Argentina – E astro Argentino di futbol, Lionel Messi diabierna a casa den su ciudad natal di Rosario, cu su pareha di semper, Antonela Roccuzzo, den u ceremonia senciyo, cu a conta cu e asistencia di algun di e grandinan di futbol, pero cu un gran operativo di siguridad.
Su compañeronan di Barcelona, Luis Suarez, Neymar y Gerard Piqué, y e futbolistanan Argentino Sergio Agüero, Gonzalo Higuaín y Ángel Di María ta algun di e 260 invitadonan na e casamento, incluyendo Shakira, pareha di Piqué.
Proteha pa guardianan di siguridad, hopi di e 260 invitadonan na e ceremonia a wordo traslada for di aeropuerto pa hotel unda cu e casamento a tuma luga, rondona door di periodistanan. Tras di un cordon di siguridad, gruponan di curioso tabata spera ansiosamente pa wak un di nan idolonan deportivo.
E astro di Barcelona y e seleccion Argentino di Futbol, cu a gana cinco balon di oro, a pidi pa e hotel unda cu e fiesta a wordo teni, wordo ocupa solamente pa asistentenan na e casamento.
Rosario, situa na 300 kmn noord di Buenos Aires, ta emociona pa e casamento di su gran estreya, considera pa hopi como un homber senciyo a pesar di su fama.
Messi y Roccuzzo, de 29 aña, a conoce otro tempo cu nan tabata mucha na Rosario y ta mayornan di Thiago y Mateo, di 4 aña y di 21 luna respectivamente.
Como regalo, e pareha a pidi un donacion den efectivo na e organisacion no gubernamental Techo, cu ta combati e problemanan di vivienda entre e pobernan na Latino America.
E ONG, cu recientemente a haya sa cu e donantenan tabata e matrimonio Messi, ainda no tin datonan precies riba e monto recauda, pero “e mas importante ta e cantidad di persona cu lo ricibi e mensahe di Techo”, segun e directora di Comunicacion, Florencia Drucker.
Fuente: www.lta.reuters.com