BARCELONA, Spaña – E astro di Barcelona, Lionel Messi, a pidi e mama di su yiunan, Antonella Roccuzzo, pa casa cun’e, segun un fuente yega na e pareha a detaya, cu e casamento lo tuma luga mediado di 2017 na Argentina.
“Messi y Roccuzzo lo bay casa na 2017. E fecha lo depende di e calender di e partidonan di Barcelona y e suerte di e ekipo catalan den e Liga di Campeonnan,” e fuente a indica.
Messi, di 29 aña y Roccuzzo, di 28, a conoce otro den su Rosario natal na 1996 y tin dos yiu: Thiago, di cuater aña y Mateo, di uno.
E noticia di e casamento di Messi y Roccuzzo a wordo anuncia diaranson pa un periodista y a yama atencion di prensa local.
“Mi a haya sa pa casualidad, e aña cu ta bay bin lo bay ta un fiesta. Mi no sa mucho bon ki fecha e lo ta, pero e lo ta na Rosario. Antonella Roccuzzo y Lionel Messi lo bay casa,” Juan Pablo Varsky a bisa na Radio Metro.
“Ta un primicia mundial, mi a haya sa di casualidad. Mi tin otro detaye pero mi no lo bay bisa nada pasobra no ta tocami. Cu Leo mi no a papia desde 11 aña pasa, pero mi a haya sa di esaki pa casualidad,” el a agrega.
Ora a divulga e noticia riba rednan social, mensahenan di felicitacion a wordo manda den avalancha pa e delantero di Barcelona y su pareha.
Fuente: NTN24