Parlamentario Endy Croes a splica cu e no sa dedica masha tempo na parlamentarionan di peso pluma, esta parlamentarionan cu ya pueblo a fada di nan y no ta kere den nan cantaleta y yoradera mas. Sinembargo cu gran asombro e por a scucha Parlamentario Mervin Wyatt Ras yorando atrobe durante conferencia di prensa. Mesora Croes a corda riba Tanta Sidonia, un artista den e storia comico di Suske en Wiske. Un señora bastante ouderwets cu su propio estilo y mas aun ta keha tur dia.
Trato di AVP na oposicion
Mervin ta yora cu 7 dia pa studia presupuesto ta mucho poco y ta culpa Coalicion pa un trato unfair. Mi educacion a siñami pa nunca paga malo cu malo. Pero ta na su luga pa recorda Wyatt Ras con AVP a trata oposicion y sigur e coalicion aki hamas lo haci mescos. Hopi straño cu Mervin a lubida asina lihe con na 2014 a duna oposicion e tempo aya solamente 2 dia y a corta hasta den e spreektijd di cada parlamentario. E begroting di 2014 tabata netamente e begroting cu Mervin Wyatt Ras mes a grita “VOOR” pa aprob’e anto cu un deficit, esta un buraco di riba 400 MIYON florin cu a alcansa 9.3% di nos GDP. E desaster aki Mervin mes a aproba. E mesun begroting aki cu Mervin a studia e tempo aya aparentemente asina bon, su Excelencia Gobernador no a firm’e y su lider Mike Eman a termina welgando bou di un palo bebiendo Ensure.
Crecemento negativo
E desaster financiero ta grandi y ta pa e motibo aki boso ta sinta den parlamento na e otro banda awe. AVP y su integrantenan mester tin berguensa pa e forma cu nan a corumpi y horta e pais aki. Mester puntra Mervin cuanto e crecemento economico tabata den 2015 y 2016 den comparacion cu locual AVP a uza den su presupuesto. Tur e presupuestonan aki el a grita VOOR y a aproba. Contesta ta para den e Statistical Digest di Banco Central 2016, unda ta confirma cu ambos aña tabata tin un crecemento negativo, esta cu NO tabata tin crecemento economico. Asina Mervin ta haci su trabao. Awor e kier bin hunga mas santo cu Papa di Roma.
Riot Comando na 2014
Ta prohibi pa lubida con 1 di october 2014 gobierno di Mervin Ras a duna ordo na Riot Comando pa bati un pueblo dilanti parlamento pasobra pueblo a bay reclama su derecho na momento cu a subi prijs di awa y coriente inhustamente. Nan a ranca sernan femenino lagando nan lomba sunu. E dia ey mi no a tende yoramento ni a sali na defensa di e ser femenino. Biniendo bek riba e presupuesto 2018, Mike Eman mes a grita cu e ta orguyoso di e debe y e debe t’ey pa tur bay pag’e den futuro. Otro siman dia 18 di april Parlamento lo cuminsa trata presupuesto 2018 den reunion publico. Mi lo haci Mervin algun pregunta desde awe y e mag di contesta mi durante dicho reunion. Mervin, bo tambe ta contento y orguyoso cu e debe mescos cu Mike? Mervin, bo ta consciente cu na 2008 e debe nacional tabata 41.7% y den 8 aña di bo cu Mike esaki a mas cu redobla y ta 93% awe? Mervin ta consciente cu e desaster financiero aki ta causando un problema social grandi y ta stagna henter un pais? Nos lo keda pendiente di su contesta. Terminando mi ta pidi pueblo comprension pa hunto nos saca e pais aki padilanti.