Mervin Wyatt-Ras: Ta reglamenta hotelnan “all-inclusive” pa garantisa pan riba mesa di trahadonan

Mervin Wyatt-Ras, durante e reunion pa reglamenta hotelnan all-inclusive y otro acomodacionnan cu a ser aproba cu mayoria voto na fabor, a trece p’adilanti cu ta reglamenta pa proteha nos trahadonan cu mester pone pan ariba mesa di nan famia. Aunke cu tin tendencia mundial pa hotelnan “all-inclusive” cu ta un pakete atractivo pa e turista toch e tipo di acomodacionnan aki tin nan consecuencia menos positivo.
E consecuencia ta pa trahadonan den restaurant, esnan cu ta traha den wholesale, taxistanan, esnan cu tin tiendanan di souvernir, kiosconan etc. E tipo di empresanan aki ta encera 64% di e entradanan di turismo. E hotelnan “all-inclusive” tin nan mesun restaurantnan, tiendanan di souvernir, etc. E trahado di e hotelnan all inclusive tampoco no ta haya tips y nos sa cu esaki pa hopi trahado ta importante pa nan por mantene nan famia. E turista ta keda mas tanto den hotel paso e ta paga tur cos na su pais y ora e ta na Aruba e ta gasta lo minimo. E placa aki pues no ta drenta den economia di Aruba. Pues nos pueblo no lo gosa di esaki.
Wyatt-Ras den prome tanda a trece padilanti cu nos por ta orguyoso cu nos pais ta un pais sigur y cu nos no mester sconde turistanan paden di hotel sino lo mester stimula nan pa nan cera conoci cu nos arte culinario, nos multiculturalidad, nos hendenan amabel y nos cultura rico.
Wyatt-Ras di otro banda ta bisa cu ora ta trata San Nicolas nos mester ta habri pa posibilidadnan aunke ta “all inclusive”. Aki e interes ta pa aloca nos hendenan ariba mercado laboral. El a keda asombra cu fraccion di MEP ta contra di un hotel na San Nicolas. E parlamentario aki ta cuestiona MEP su motibonan. Diferente gobierno a purba habri un hotel de area di San Nicolas y te ainda no a logra y pesey mes segun e Parlamentario aki nos mester wak tur opcion pa San Nicolas y el a keda contento di tende cu minister tambe ta pensa den e direccion aki. Wyatt-Ras ta trece p’adilanti cu e y su coleganan a combersa cu un cantidad di stakeholder prome cu tratamento di e ley y a base di esaki a forma un opinion. Ta lamentable cu oposicion ta wak e asunto di un banda so. Miembronan di fraccion a presenta un amienda y 7 mocion, entre e mocionnan tin un tambe pa mas aleu bin cu un ley pa reglamentacion general di nos turismo y ta un lastima cu MEP a vota contra. Wyatt-Ras ta haya si cu banda di “all inclusive” Gobierno lo mester haci un investigacion con pa stimula incentivanan pa desaroyo e hotelnan basa riba “European plan”. Nos tin cu sigui diversifica y sea orguyoso di loke nos tin. Pasobra Aruba tin bunita santo blanco, playanan bunita, nos hendenan amabel y servicial y nos ta un pais sigur. Nos no mag lubida e ingredientenan importante aki, segun Wyatt-Ras.

Comments

comments