Drs. Mervin Wyatt-Ras como cuidadano tabata presente na e anochi informativo den Centro di Bario di Savaneta tocante un edificio multifunctional den bario di Savaneta. Durante e anochi tabatin diferente orador: sr. Omar Harms, sra. Kimberly Boekhoudt, e arkitecto sr. Thijsen y ministro Presidente, mr. Mike Eman.
Un MFA den bario ta un gran bentaha en bista cu e lo ubica diferente servicio gubernamental, social y priva bao di un solo dak. Habitantenan di e bario banda di busca servicio den e facilidad por topa otro, combersa y intercambia. Lo tin espacio disponibel pa por atende charlanan informativo. Di e forma aki un MFA lo tin un funcion no solamente di servicio sino tambe social y cultural.
Den e MFA na Savaneta lo ser ubica e.o. servicio di bevolking, impuesto, biblioteca, asistencia Huridico, lo tin un cafeteria y tambe un huki pa mucha hunga. Esnan presente a haci preguntanan. Lo bay forma un “klankbord groep” cu lo inventarisa loke ta biba den e bario pa por tene cuenta cun’e. Esnan presente por a inscribi pa participa den dicho grupo. Wyatt-Ras procedente di sector social ta considera cu lo ta bon pa por agrega servicio social den e facilidad. Manera cu a ser informa ta keda si na empresa of instancianan (gubernamental/priva) pa nan por ubica nan mes den e facilidad. Ta sigur cu un MFA lo contribui na un miho cohesion y union den e bario. Por tuma como ehempel e facilidad di Noord y di Paradera. Por nota e entusiasmo di pueblo pa cu dicho facilidadnan y nan servicio. Gobierno den su vision pa sigui trece servicionan mas cerca di nos pueblo lo sigui alabes cu construccion di facilidadnan na Sta. Cruz, San Nicolas y Dakota. Wyatt-Ras ta spera cu pronto lo por efectua apertura di e facilidad na Savaneta.