Awe tabata prome dia di trabao di Mervin Wyatt Ras como presidente di Parlamento nobo y por bisa cu e tabata tin hopi trabao.
El a menciona cu gran placer e ta asumi su responsabilidad pa e traha pa pueblo. Ya caba diamars tabata tin yamada y peticionnan pa un reunion hopi importante tocante di criminalidad y caminda tabata tin un caso cu a surgi y cu Parlamento lo mester atende cune.
A haya dos peticion, tanto di Fraccion di MEP como esun di AVP pa reunion y un ta pa yama un reunion publico y uno pa yama un bijeenkomst. Awor aki ta den comienso cu minister Sevinger pa un reunion cu tin cu continua. Esaki tabata su prome reunion, segun Wyatt-Ras.
El a dicidi e ora yama un bijeenkomst pa asina por scucha e minister di husticia, hunto cu diferente profesional pa asina por haci pregunta na nan pa por prepara si ta bay tin un reunion publico, mirando cu ta dos peticion a wordo haci pa bouw op y ta bon pa haya tur informacion necesario pa e Parlamentarionan por debati a base di contenido.
Pesey e Presidente di Parlamento a scoge pa e forma aki.
Tin cu bisa cu plannan ta hopi. Tin hopi cos cu ta pendiente cu tin cu rond af, manera tin e ley di ombudsman, cu mester finalisa. Tin tambe e staatsregeling cu a bin cu cierto cambio den dje cu tin cu keda cla cun’e. Tambe tin e verzelfstandiging di parlamento, haciendo e mas independiente, pe por tin un cuerpo y ta un organo manera mester ta. Tambe e proceso di digitalisacion di Parlamento cu ta un proceso cu den tempo cu e tabata presidente caba el a cuminsa y por continua cun’e tambe. Banda di esey tambe tin cu sigui traha riba e reglement van orde door cu tin diferente cambio moderno cu tin cu bay sigui introduci pa asina eleva e forma di traha cu tin den Parlamento y tambe evalua diferente cos cu tin cu wordo haci den Parlamento mes, pa hisa e calidad di trabao cu ta duna na pueblo segun Wyatt-Ras.