Ya caba preguntanan pa Gobierno a sali di parti di Parlamento pa loke ta presupuesto pa aña 2017. Esaki ta segun presidente di Parlamento, Mervin Wyatt-Ras.
E ta sigui splica cu a fiha e fecha algun siman pasa y ora cu a ricibi e presupuesto, e fecha tabata 18 di October, unda cu e diferente miembronan di Parlamento a haci nan pregunta. E preguntanan a yega cerca e presidente y lo bay wordo poni den un relato y e relato aki lo bay wordo aproba tambe den Parlamento, den un reunion di comision central y asina e relato aki por bay caminda pa Gobierno. E ora tambe ta keda na Gobierno pa asina mas pronto posibel nan por traha riba e contestanan pa Parlamento pa por haya e nota di contesta di e pregunta y e ora tambe por pone e prespuesto di pais Aruba riba agenda. Den e siman di comienso di November ta supone cu Gobierno lo ta cla cu e diferente contestanan, pasobra si wak bon, e ta preguntanan di tur e diferente departamentonan. Semper e presupuesto di pais Aruba, den e caso aki pa 2017, ta encera tur e departamentonan. E ta tuma tempo manera cu tin di compronde, pasobra e departamentonan lo bay haya e preguntanan. Nan tin cu contestanan y despues tin cu bay cerca e persona cu ta bay hinca nan den e cuadro bunita, pa asina nan por bay Parlamento den e nota di contesta di Gobierno. Nota naar aanleiding van het verslag. Tambe sa tin nota di cambio riba e ley y esey tambe tin cu bay Parlamento. Ta di spera cu den e comienso di November, por tin nan den Parlamento pa cumpli tambe cu schedule. Tin stipula tambe cu tin recess dia 22 di December cu ta bin. Kiermen ta laga Gobierno sa esey caba. Kier trata tur e diferente leynan cu ta bay haya den e temporada eynan. Tin un periodo den December caminda cu nan tin algun trabao pa haci den exterior. Esey ta fiho tur aña y tin cu tene cuenta cu esey. E bala awor aki ta den scochi di Gobierno pa por manda e presupuesto ora cu por stel vast e rapport aki, pa asina por tin e contestanan pa por trat’e den reunion publico.
Gobierno no tin un deadline. Parlamento kier haya e presupuesto den comienso di November pa por riba agenda pa asina por cumpli cu schedule, sino e ora e ta sali foi man. E peticion tambe na Gobierno pa e ora pa e por entrega esaki pasobra tin varios otro presupuesto tambe. Tin di DOW, TPF, tin esun di Raad van Advies. A caba di aproba e presupuesto di Parlamento mes di aña 2017 y Algemene Rekenkamer. Tur esakinan ta ainda cu tin cu trata den reunion publico. Kier agrupa tur pa asina por pasa over eynan pa por tin un clean, pasobra e presupuesto a wordo entrega na tempo. Wyatt-Ras ta contento cu e caso y e ora cu Parlamento a cumpli y awor Gobierno tambe tin cu cumpli pa keda cla prome cu fin di aña.