Dialuna a habri cu un reunion importante pa loke ta pasando den casonan di atraco pa cual aki Sra. Mervin Wyatt- Ras, presidente di Parlamento, a splica kico a ser trata.
Segun Sra. Wyatt- Ras a bisa, e reunion tabata un informatieve bijeenkomst, caminda Sra. Desiree de Souza- Croes, den nomber di fraccion di AVP a pidi e reunion aki. Mirando cu den e ultimo temponan aki, tabata tin e aumento di atraco y e poblacion ta sinti nan mes insigur , Sra. Wyatt Ras a yama e reunion mas pronto posibel.
Intencion di e reunion ta pa haya informacion, y cada Parlamentario por haci nan trabao tocante e esaki. Seguramente, durante e presentacion, a trece cierto puntonan dilanti, y miembronan di Parlamento tambe a haci pregunta, p.e. encuanto e control cu tin, e diferente cooperacion cu tin entre diferente instancia, cu mester tin un overleg di informacion cu tin entre e diferente instancianan. Hopi di e coleganan di fraccion, ta pidi pa e prevencion den comunidad, unda cu mester tin mas polis riba caya cu pueblo por acudi mas lihe cerca cuerpo policial. Ya nos hendenan no ta sinti nan mes sigur den nan cas.
Esakinan ta puntonan, caminda leynan mester wordo cambia, preguntanan a wordo haci over di esaki y Sra. Wyatt- Ras ta en espera di e contesta di Minister, ki leynan mester cambia, pa facilita tambe e diferente instancianan pa haci nan trabao. A wordo bisa cu Cuerpo Policial y otro instancianan ta haciendo nan trabao cu nan medionan disponibel. Lo bay tende si ta necesario pa mas medionan pa haci e trabao miho y mas eficiente y siguramente di parti di miembronan di Parlamento, cada un riba nan mes lo bay scucha kico ta necesario y lo bay bin cu esakinan durante un reunion publico of por pidi reunionnan pa por sigui traha ariba esaki.
Momento cu un persona ta wordo atraca den su cas, y nan ta sinti su mes menasa, Parlamento, Gobierno y tur instancia mester haci algo. No por permiti cu un hende ta bin haci fechoria den bo propio cas. Sra. Wyatt- Ras ta haya e presentacion cu e minister a haci prome cu e diferente preguntanan a wordo haci, hopi bon y al caso. Ta spera di haya e contestanan pa asina wak kico por haci mas aleu.
Presidente di Parlamento ainda no sa cual ta e leynan cu mester wordo cambia, a menciona LTU, e VuurwapenVerordering y otro leynan cu mester wordo evalua. Seguramente di parti Parlamento, momento cu e ley drenta, su persona den e funcion aki ta pasa e leynan aki hopi lihe. Segun Sra. Wyatt- Ras, si e ta algo importante pa garantisa siguridad di e pueblo, siguramente e lo por wordo trata e dia despues cu e ley drenta. Tur ley mester cana nan caminda, pero nan mester wordo traha y presenta den Parlamento, segun Presidente di Parlamento, Sra. Mervin Wyatt- Ras.