Diamars den Parlamento a reuni den un Senioren Convent pa stem af cu diferente lidernan di fraccion, pa wak con ta handle cun’e. Door cu ta un ley cu tin cu trata cu urgencia, a pensa di haci’e e siman aki, pa en todo caso cu tin un reunion di Comision Central riba diahuebs y despues tambe pa bay den e reunion publico, e debate publico dialuna cu ta bin. Eseynan ta loke ta bay wordo discuti, pero tin cu bay formalis’e ainda cu e miembronan di parlamento den e reunion. A papia riba riba e ley aki y tabata tin peticion pa por haya stukken y esakinan ta ter inzage na Parlamento, unda cu miembronan di Parlamento por tuma nota di esakinan y por prepara nan mes debidamente pa e debate e ora.
Esaki ta trata e Ley di Citgo y tambe e ley pa loke ta Refineria di Aruba, segun Mervin Wyatt-Ras. E dos leynan aki ta hunto den un solo. E no ta un ley grandi. No mas cu e embergadura ta grandi. En todo caso ta importante pa finalisa e tratamento mas pronto posibel pasobra tin e deadline di 1 di October cu e lo tin cu bin na vigor y asina cuminsa cu e otro palabracionnan cu tin andando.
E tabata pa trata caba per 1 September. Te hasta a bisa cu mester bin den recess pa por trat’e. Tur hende a bay di acuerdo cu esey. Pero el a bin awor aki y cu hopi diligencia Parlamento lo kier yega na e tratamento den reunion publico.
Wyatt-Ras a agrega cu esaki ta uno cortico, pa motibo cu ta un ley cu a haya basta informacion durante henter e proceso. A haya informacion for di esnan cu ta den e deliberacion y tambe di e comision cu a sostene e minister den tur e deliberacionnan. E minister encarga tambe a bin parlamento y a haya varios presentacion na varios ocasion. Awo e ley ta riba mesa y ta kere cu tur hende ta basta prepara pa asina por ta mas lihe cu por duna e comentario y preguntanan pa e ora e ministernan por bin contesta den un reunion publico, segun Wyatt Ras.