Mervin Ras (AVP): “Pueblo no ta mira e cambio priminti pero si ta wordo castiga”

0
RBC Juli 2018
Funmiles-2018

Parlamentario, drs. Mervin Wyatt-Ras, durante tratamento di presupuesto 2018 di e ministerio di Asuntonan General y di Finanzas y Economia a lansa cantidad di preguntanan y a haci comentarionan hopi critico na gobierno. Segun e parlamentario enbes cu nos pueblo a mira e cambio cu gobierno a priminti e ta ser castiga.
Wyatt-Ras a cuestiona cu e presupuesto a yega super laat, esta despues di 5 luna cu gobierno a asumi e responsabilidad pa tuma rienda di e pais. El a critica cu gobierno contrario na loke a ser priminti no a baha su propio gastonan di operacion y baha e cantidad di ministernan te na 7. En cambio gobierno a hisa e cantidad di empleadonan den gobierno y a subi su gastonan di pr, auto, biahenan, etc.
E parlamentario a cuestiona cu gobierno al contrario lo castiga nos pueblo cu aumento di BBO te na 6%, cual lo tin su impacto ariba nos economia y nos famianan, en special esunnan mas vulnerabel. E consecuencianan lo ta cu prijsnan di comestibel lo subi, huur di vivienda, transporte tambe lo subi, dunadonan di trabou lo sinti e efecto y lo bay over den hisa prijsnan, hasta kita empleadonan cu consecuencia cu nan lo no por paga cas, hypotheek, otro debenan y ta cay den deterioro social. En berdad lo tin e ora ey un crisis social y mester di inverti den e area social pa por cumpli cu tur e consecuencianan di e aumento di BBO. Si a baha e cantidad di ministernan cu 1 mas por a spaar 40.2 miyon florin locual lo por a yuda baha gasto ya cu gobierno pa 8 aña largo a keha cu tin mega debe.
Un otro punto di critica di Wyatt-Ras tabata cu di un banda Mep a priminti cu lo habri CITGO y duna nos pueblo trabou, mientras awe gobierno MEPPORRED ta bisa lo contrario esta cu lo mester cuminsa pensa ariba un otro pilar economico cu no ta refineria y ta menciona cannabis como pilar economico pa futuro. Wyatt-Ras a cuestiona con por ta cu di un banda gobierno ta bisa cu marihuana ta parti di crisis social. Aki referiendo na e hecho cu a haya cu un di e muchanan inocente cu a perde su bida recientemente pa motibo di maltrato y abuso tabata bao influencia di marihuana, mientras kier haci Cannabis como un pilar di nos economia. Pues di un banda Cannabis ta parti di crisis social y hasta ta ocasiona esaki y di otro banda kier introduci cannabis como pilar economico pa futuro.
Wyatt-Ras a cuestiona gobierno pa loke ta trata e falta di prioridad pa e plan social paso di un banda a anunci’e cu fanfaria y di otro banda sin bisa Parlamento kier a kita 5.6 miyon bek, den nota di cambio no.2. Dor cu Wyatt-Ras den nomber di fraccion a reclama gobierno a core pone e suma aki bek pa ehecucion di e plan.
Wyatt-Ras a cuestiona alabes e hecho cu gobierno ta declara cu Hulanda no tin confiansa den Aruba. Segun gobierno esaki tin di haber cu gobierno anterior. Wyatt-Ras a trece padilanti con por aclaria tur e rapportnan di CAFT te cu 2017 den cual CAFT tabata mira cu gobierno anterior tabata cumpli cu normanan di CAFT cu e vision di logra baha e deficit te yega un surplus di 0.5% e aña aki. Acaso gobierno ta bisa cu CAFT a gaña den su rapportnan? Con ta posibel cu prome cu eleccion gobierno anterior tabatin confianza di gobierno Hulandes y awor diripiente no tin confiansa mas. Segun Wyatt-Ras e falta di confiansa aki tin di haber cu e gobierno aki. Ta e gobierno aki prome cu por a entrega presupuesto na Parlamento a bai yora na Hulanda na varios ocasion. P’esey Hulanda a cambio di scucha yoradera di e gobierno aki a fiha un deadline pa gobierno por entrega e presupuesto 2018 pa dia 30 di april y CAFT a baha su exigencianan pa gobierno.
Tambe Wyatt-Ras a cuestiona e asunto di Venezuela unda cu den pasado e gobierno aki a critica gobierno anterior cu lo a pone shelter pa Venezolanonan den caso di cualkier eventualidad, locual ta basa riba derechonan internacional y awor nan mes ta bay pone shelter.
Wyatt-Ras su pregunta cuanto famia ya tin nan awa y coriente coloca sin pago manera gobierno a priminti lastimamente e no a haya contesta ariba su pregunta. Tampoco no a contesta ki dia lo baha edad di pensioen y hisa salario minimo manera a priminti pueblo.
Otro asunto cu Wyatt-Ras a cuestiona ta continuacion di construccion di MFA na San Nicolaas. Gobierno anterior a construi edificio di MFA na Noord, Paradera y Savaneta. A cuminsa cu construccion na Sta. Cruz y falta e.o. San Nicolaas. Gobierno aki diripiente a bisa cu no tin medionan financiero pa MFA San Nicolaas y ta culpa gobierno anterior di esaki. Wyatt-Ras no ta di acuerdo paso e proyectonan ta cay bao SOGA. Gobierno aki mester papia berdad y bisa cu simplemente e ta contra construccion na San Nicolaas segun Wyatt-Ras.

Comments

comments

C: Heineken
new india