Diahuebs pa 7or di anochi Parlamento di Aruba a pasa e Ordenansa Nacional Ortografia di Papiamento oficialmente. Esaki despues cu desde aña 2007 caba tin un concepto di e ley para cla. Cu cambionan haci na e concepto, e ordenansa aki a wordo entrega di nobo aña pasa na Parlamento.
Mensahe di Parlamentario Setty Christiaans-Yarzagaray ta cu ta un dia importante cu ta marca historia ora di pasa e ordenansa aki pero mas cu e show cu esaki por trece cu n’e, gobernantenan hunto cu expertonan riba e materia aki mester manten’e bibo awor.
Mirando desaroyo technologico y transformacion den e mundo digital, ta importante pa mantene idioma Papiamento tambe dinamico. Na banda cu idioma riba su mes ta dinamico, haci cu idioma ta keda bibo, tambe pa e generacionnan mas jong y esunnan cu ta bin, tambe tin su dinamica cu n’e.
Sea ta den forma papia, skirbi, canta of declama, su uzo corecto mester wordo stimula y coregi pa awor e haya realmente e honor cu e merece.
Pabien ta bay na tur cu a traha y ta traha di un manera of otro cu nos lenga Papiamento, cu awe e por a haya su luga oficial tambe den forma di un Ordenansa Nacional Ortografia di Papiamento. Masha pabien Aruba.