Segun Meredith Britten-Solognier, di e Cash and Vault Department di Banco Central, e placa a yega centra Banco Central via un banco comercial. E ta sigui conta cu awor aki ta bezig cu un investigacion den e caso aki hunto cu e banco local.
A detecta vooral na e papel cu nan a ripara cu no ta mesun cos di esun legitimo. Tambe a ripara cu e watermerk no ta riba e biyete y tambe e hilo di siguridad tampoco no ta cuadra cu un biyete original, esta legitimo.
Te awor aki a ricibi dos biyete di 100 florin falso. Mirando e biyetenan cu a produci awor aki, nan ta hopi cerca di esun original, segun Britten-Solognier. E tin un peliger pa e persona mes financieramente y tambe pa Banco Central, caminda cu ta pone nan den un alerta. E por sosode tur caminda, cerca tur comerciante y mester ta alerta pa ora tuma un biyete, pa nan ripara bon si e ta un autentico.
Pa haya mas informacion pa nan wak cua compara cu un biyete falso y un autentico, nan por pasa na Banco Central pasobra tin foyeto unda cu ta indica riba tur e puntonan di identificacion cu un biyete original tin y a base di esey tambe riba e website di Banco Central, cu ta www.cbaruba.org y por haya e informacion necesario y tambe e foyeto di cual nan por wak y compara un biyete autentico y uno falso. Eyriba tin tur e puntonan di identificaicon y di siguridad. Un di e puntonan sigur cu nan por wak riba un biyete ta e watermerk. Esey ta manera mas facil pa por reconoce un biyete autentico di biaha. E manera mas facil wak pa e tin e watermerk cu ta un watapana, segun Britten-Solognier.