NEW YORK CITY, New York – E mercadonan Mericano di crudo ta prepara Dialuna pa e consecuencianan di e posibel sancion di Merca contra e sector petrolero Venezolano, tras di e eleccion di un Asamblea Constituyente den e pais sur Americano cu funcionarionan Mericano, a cualifica como un “farsa.”
Dialuna, e presidente Venezolano, Nicolas Maduro, a celebra e eleccion di un organismo legislativo nobo cu lo bay tin facultadnan pa rescribi e Constitucion y disolve institucionnan manera e Congreso.
Hopi pais a denuncia y a desconoce e proceso.
Tempran den e sesion, e futuro di crudo na Merca a subi riba 50 dollar pa bari pa prome biaha den casi dos luna, despues cu funcionarionan Mericano a bisa cu dialuna nan por anuncia e sancionnan. E prijsnan posteriormente a laga tereno habri.
Ainda no ta cla cualnan por ta e medidanan, pero no ta spera cu por inclui un prohibicion na e envionan di crudo Venezolano pa Merca. Nan ta considera mas probabel cu ta impedi e envionan for di Merca di crudo light, loke cu Venezuela ta mescla cu su crudo pisa pa prepar’e pa benta.
“Sancionnan cu ta prohibi e exportacionnan di crudo y productonan Mericano, lo obliga Venezuela cumpra otro productonan cu un prima, loke lo pone e situacion fiscal di Venezuela mas tenso, cu ya caba tin problema pa cubri nan obligacionnan, Jason Bordoff, director di Center on Global Energy Policy di e Universidad di Columbia, a bisa.
Otro opcionnan den consideracion ta inclui sancionnan individual of varios medida pa restringi e acceso di Gobierno Venezolano y di e estatal petrolero PDVSA, na e sistema bancario Mericano.
Venezuela ta un fuente clave di suministro di crudo pisa sulfurico pa refinerianan Mericano. E importacionnan di Merca di crudo Venezolano den e prome cuater lunanan di e aña aki a calcula 724 mil bari pa dia (bpd) of cerca di un 9 porciento di tur e importacionnan di crudo.
E pais Sur Americano a bira mas dependiente di e importacionnan pa mescla debi na problemanan den su refinerianan, cu ta operando hopi abao di su capacidad.
Pa loke ta e aña, Venezuela a ricibi un promedio di casi 87 mil bpd di combustibel produci na Merca. PDVSA a cumpra crudo light Mericano atrabes di su terminal Bullenbay na Corsou.
Refinerianan Mericano manera Valero Energy Corp y Marathon Petroleum Corp tabata reduciendo su procesamento di crudo pisa manera esun cu Venezuela ta suministra y otro productornan di OPEP, pa loke ta e impacto den su negoshinan posiblemente lo ta menor.
Fuente: www.reuters.com