WASHINGTON, D.C./DAMASCO- E presidente di Merca, Donald Trump a anuncia diabierna anochi cu el a duna ordo pa lansa atakenan di precision na Siria, contra obhetivonan vincula cu e programa di arma kimico den e pais. El a señala cu e medida ta contesta na e bombardeo cu armanan kimico di weekend pasa.
“Mi a duna ordo na e forsanan arma di Merca pa lansa atakenan di precision contra obhetivonan asocial cu e capacidad di arma kimico di e dictador Sirio, Bashar al Assad”, Trump a declara desde e Sala Diplomatico di White House. Avion y barconan Mericano a wordo uza den e atakenan, segun varios funcionario di defense Mericano.
E mandatario Mericano a informa cu e atakenan ya ta andando y a wordo haci den coordinacion cu Francia y Gran Britania, De hecho, diabierna e Prome Minister di Gran Britania, Theresa May a anuncia tambe den un comunicado cu el a autorisa e Forsanan Arma Britanico pa realisa atakenan coordina y selective pa degrada e capacidad di armanan kimico di e regimen Sirio y pa e stop su uzo”.
E Defensa Aereo Sirio ta “respondiendo na e agresion Britanico, Mericano y Frances”, segun television estatal Sirio. E medio di comunicacion a informa cu e defensanan aereo di su pais a alcansa 13 misil na Al Kiswah den e suburbionan di Damasco. El a indica tambe cu tin informenan di agresionnan contra e centro di investigacion den e area di Barzeh na Damasco.
President Trump a splica cu e obhetivo den e medida “na establece un fuerte elemento di disuasion contra di e produccion, propagacion y uzo di armanan kimico. “E respuesta combina contra di Merca, Gran Britania y Francia na e horrornan a integra tur e instrumentonan di nos poder nacional: militar, economico y diplomatico”, el a detaya.
Ademas, el a indica cu e atakenan lo sigui te cu e Siria stop e uzo di armanan kimico di parti di e regimen Sirio. “Nos ta prepara pa sostene e respuesta te ora cu e regimen Sirio stop e uzo di agentenan kimico prohibi”, el a sigura.
Trump a agrega den su discurso cu Merca “no por salba e mundo di cosnan malo ni actua tur caminda cu tin tirania”.
Incluso, el a describi Medio Oriente como un luga “problematico”. Nos ta purba di haci lo miho, pero e ta un luga problematico”, Trump a bisa. “Merca lo ta un socio y un amigo. Pero e destino di e region ta den man di su mesun hende”.
Fuente http://cnnespanol.cnn.com