WASHINGTON, D.C., Merca- Pentagono a lansa exitosamente un misil balistico intercontinental uzando su mesun interceptor di misil di largo alcance. Esaki ta wordo mira como un prueba di e capacidad di Merca pa contraaresta e lansamento di un misil di parti di Noord- Korea.
E Agencia di Defensa a lansa un misil interceptor basa riba tera for di e base di Vandenberg di e Forsa Aereo na California, pa intercepta un misil balistico.
E interceptor a destrui e blanco den un confrontacion directo”, segun un comunicado di e Agencia di Defensa di Misilnan.
E interseccion di un misil ICBM, compleho, cu ta representa un amenasa ta un logro increibel, y ta fundamental pa e programa aki, segun e director di MDA, vicealmirante Jim Syring.
“E sistema aki ta di sumo importancia pa e defensa di nos pais, y e prueba ta demostra cu nos tin un elemento di disuasion capas y creible contra un amenasa hopi real”, ela bisa.
Mientras cu Pentagono ta bisa cu e prueba aki tabata un exito, algun experto a adverti cu e sistema di defensa antimisil di 40 biyon dollar ainda tin un caminda largo pa bay prome cu e por wordo considera totalmente desaroya.
E prueba aki ta bin solamente dos dia despues cu Pyongyang a lansa un misil balistico di corto alcance cu a biaha mas o menos 248 miya, bayendo abao den e zona economico exclusivo di Japon.
Den un tweet dialuna, presidente Donald Trump a uni na e lidernan di Korea del Sur y Japon den condena e prueba, bisando cu Noord- Korea a “demostra un falta di respet grandi” pa China door di “lansa un otro misil balistico”.
Fuente: www.cnn.com