Merca ta retira miles di ton di carni door di salmonella

NORTH CAROLINA, Merca- Miles di tonelada di carni di baca y porco a wordo retira for di e tiendanan di Merca pa evita e a propagacion di dos epidemia detecta den varios entidad. Uno di listeria y otro di salmonella, cu a causa e morto di un persona y a laga decenas di persona malo.

E Centro Nacional pa e Control y Prevencion di Malesa (CDC) a informa cu funcionarionan di salud publico di varios entidad ta investiga un brote multiestatal cu e ham, produci pa e compania Johnston County Hams, Inc., di North Carolina.

Cuater persona a wordo infecta cu e principio di listeria a wordo raporta na North Carolina y Virginia. Y un di nan a fayece, e CDC a precisa.

E hamon tabata wordo bendi den pakete di 3.5 kg lora den plastic y cu a wordo manda pa e planta procesado na Smithfield, North Carolina, na otro partinan di e estado, como tambe New York, Maryland, Virgina y South Carolina, entre april ultimo y october.

Listeria ta un di e bacterianan mas comun cu ta causa intoxicacion alimentario. E contagio ta caracterisa pa diaree y keintura, di un pa cuater siman despues di e infeccion. Aunke cu algun persona por tarda te cu 70 dia den mustra sintoma.

Entre tanto, al menos 57 persona den 16 entidad di e pais a wordo contagia cu salmonella ora cu nan a come carni mula procesa pa e compania JBS Tolleson, Inc., Arizona, desde 5 di augustus te cu 6 di september ultimo.

Carni curu a wordo empaketa riba varios fecha entre juli y september, segun un declaracion di e Servicio di Inspeccion y Siguridad Alimentario (FSIS) di e Departamento di Agriculutra di Merca.

Casi tres mil ton di carni cu e marca di inspeccion “EST. 267” di e Departamento di Agricultura a wordo retira for di tiendanan den henter e pais. Algun di e carninan por ta gefreeze y ya caba por ta den e freezernan di e consumidornan, FSIS a adverti.

E mayoria di e personanan ta recupera sin tratamento, pero den algun caso, specialmente den anciano y mucha, e malesa por complica su mes y rekeri tratamento medico. Na Merca ta registra casi 40 mil caso di salmonella pa aña, pero e gran parti di e incidente no ta wordo raporta.

 

Comments

comments