Despues di varios luna den suspenso, presidente Donald Trump a cumpli su promesa electoral. Diahubes e mandatario a a nuncia cu Merca lo retira for di e Acuerdo di Paris riba cambio climatico aproba pa 195 pais na December 2015.
“Mi mester cumpli cu e deber solemne di proteha Merca y su ciudadanonan, como tal Merca ta retira for di e acuerdo climatico di Paris”, Trump a bisa for di e hardinnan di White House.
Asina tambe, Merca ta uni su mes na Nicaragua y Siria como e unico paisnan di e Convencion Macro di Nacionnan Uni riba e Cambio Climatico cu no ta apoya e tratado ambiental.
E Acuerdo di Paris ta wordo considera pa hopi como e logro ambiental mas importante di su historia pa su alcance global y su obhetivonan a largo plazo.
Trump a afirma cu su pais lo pidi pa renegocia e tratado “den terminonan husto pa Merca” como condicion pa regresa na e acuerdo.
Despues di China, Merca ta e emisor di broeikaseffect mas grandi na mundo.
Segun Trump, saliendo for di e Acuerdo di Paris lo yuda e industrianan di petroleo y carbon di su pais.
“Nos no kier pa otro pais hari nos. Y nan lo no haci esaki. Mi a wordo eligi pa representa e ciudadanonan di Pittsburg, no di Paris”, e mandatario a afirma.
Na 2012, Donald Trump a califica e cambio climatico como un “mentira Chines” pa perhudica e fabricanan Mericano.
Poco despues di e discurso di Trump, den un comunicado hunto, Alemania, Francia y Italia a señala cu e Acuerdo di Paris no por wordo renegocia.
E Acuerdo di Paris ta “un piedra angular di cooperacion entre varios pais”, e comunicado firma oa e Presidente Frances, Emmanuel Macron, e Canciyer Aleman, Angela Merkel, y e Prome Minister italiano, Paolo Gentiloni.
“Nada por wordo renegocia”, Macron a bisa Trump den un combersacion telefonico.
Fuente: www.bbcmundo.com