WASHINGTON, D.C., Merca- Diahuebs Merca a anuncia sancion contra di tur “transaccion ilicito” di gobierno Venezolano cu e sector di oro di e pais.
John Bolton, asesor di siguridad nacional di presidente Mericano, Donald Trump, lo anuncia e sancionnan aki durante e discurso tocante Latinoamerica, según un alto funcionario a declara na un grupo selecto di medionan.
Pa loke ta Venezuela, Trump a firma un decreto cu lo drenta na vigor pa mei anochi, unda cu e ta pidi secretario di Estado, Mike Pompeo y di Tesoro, Steve Mnuchin, pa “identifica sectornan di economia Venezolano”, cu lo por ta blanco di e sancionnan nobo aki di Merca.
E idea ta pa “sanciona entidadnan y individuonan cu ta actuando di forma dentro di e sectornan aki”, e funcionario a indica.
Pa awo, Merca a identifica un prome sector, esun di oro, cu “gobierno Venezolano a uza pa haci transaccionnan ilicito”, cual beneficio ta wordo probecha supuestamente pa mantene e poder.
“Cu e sakeo nan no ta solamente hortando patrimonio di su propio pueblo, sino cu loke nan ta haciendo tambe lo tin consecuencianan medioambiental grave, manera e mercurio den e riunan”, el a splica.
E fuente a enfatisa cu Merca lo no persigui e exportacionnan di oro “legitimo” y a bisa cu e decreto di Trump lo por “uza otro sectornan den futuro”.
Ora cu a puntra di petroleo por ta un di nan, e funcionario no a descarta esaki, pero a afirma cu Merca lo kier “preserva e activonan cu ta pertenece na e pueblo Venezolano”.
Washington ta calcula cu den e ultimo lunanan, 21 ton metrico di otro” lo a sali “pa Turkia principalmente” den exportacionnan “sin contabilidad algun pa sa unda e fondonan ta bay”, e subsecretario di Tesoro, Marshall Billingslea a adverti siman pasa.