MERCA – Gobierno Mericano ta emiti un alerta di biahe pa e “alto riesgo di atentadonan terorista den henter Europa” durante e periodo di vakantie di final di aña. E alerta lo ta na vigor te cu dia 20 di Februari.
E Departamento di Estado a adverti e anochi di dialuna cu tur ciudadano Mericano “mester ta cauteloso den festival, evento y mercadonan cu ta wordo celebra den aire liber.”
Gruponan extremista “ta sigui planea atakenan terorista na Europa, probechando e proximo temporada di vakantie y e acontecimentonan relaciona cu nan,” el a anuncia.
“E ciudadanonan Mericano tambe mester ta atento na e posibilidad cu e simpatisantenan extremista of extremistanan autoradicalisa por haci atakenan durante e epoca aki cu poco of sin previo aviso,” Departamento di Estado a subraya.
ISIS a adhudica e autoria di atentadonan na Francia y Belgica desde Januari di 2015, cu a laga mas di 250 morto y centenares di herido.
Fuente: NTN24