NEW YORK/CARACAS- E visa di e miembronan di e delegacion Venezolano na e Organisacion di Nacionnan Uni (ONU) lo wordo modifica di e categoria G1 pa G3, door di Merca, den e sede di ONU na New York.
E funcionarionan a ricibi un comunicado di e embahador Venezolano na ONU, Samuel Moncada unda cu e ta solicita pa nan entreg’e un serie di compensacion, mirando cu su documento di autorisacion diplomatico lo wordo “degrada”.
E comunicado di ta specifica cu G1 ta e visa cu ta wordo otorga na “miembronan permanente di un mision diplomatico reconoci, como tambe su famia”, mientras cu G3 ta e visa cu Merca ta aplica na “representantenan di gobiernonan no reconoci of no miembro, y nan famia directo”.
Como fecha limite estableci door di Merca, e diplomaticonan lo mester realisa e cambio di visa prome cu dia 29 di maart, segun e comunicado ta bisa.
Segun e embahada di Merca, miembronan di un mision permanente di un mision permanente di un gobierno reconoci na un organisacion internacional ta eligibel pa un visa G-1; representantenan di un gobierno reconoci biahando temporalmente pa Merca pa atende reunionnan di un organisacion internacional ta eligibel pa un visa G-3; visa G-4 ta wordo emiti pa individualnan cu ta biaha pa Merca pa un cita asigna na un Organisacion Internacional, incluyendo Nacionnan Uni.
Cu e medida aki, Samuel Moncada, embahador di Venezuela na ONU ta limita su desplasamento na 25 miya for di e edificio di ONU na Manhattan.