NEW YORK, Merca- Durante un reunion di e Conseho di Siguridad di Nacionnan Uni, un declaracion proponi door di Moscu unda ta condena e atake terorista contra di e Embahada Ruso na Damasco, a wordo blokia door di Merca. Esaki a wordo informa door di e agencia Tass, cu ta cita e secretario di prensa di e mision permanente di e Federacion Ruso na Nacionnan Uni, Fiódor Strzhizhovsky.
“No ta prome biaha”, segun Strzhizhovsky, “cu lidernan di e asina yama coalicion ta mustra dos cara relaciona cu e atakenan terorista, ora cu nan obhetivo ta e misionnan diplomatico Ruso den exterior.
Dialuna, e Minister di Exterior di Rusia, a raporta cu e embahada Ruso na Damasco, a wordo ataca desde posicionnan ocupa pa teroristanan. E proyectilnan lansa contra di e sede diplomatico no a laga victimanan humano, pero si dañonan grandi den su infrastructura, como tambe e sistema electrico y e sistema di suministro di awa.
Moscu, cu a yama esaki di “provocacion”, y su canciyeria a manifesta speransa di cu paisnan occidental integrantenan di e Conseho di Siguridad di ONU, “tin e spirito di no keda keto, pero di haci un evaluacion publico apropia di e incidente, cu ta menasa bida di e diplomaticonan Ruso”.