WASHINGTON, Merca- Door di e aumento drastico di inmigrantenan ilegal desde Centroamerica, e Administracion ta studiando pa formalisa su politica di separa muchanan for di nan mayornan na e frontera zuid, segun un fuente di e Departamento di Siguridad Nacional (DHS) a confirma.
Aunke cu agentenan di Inmigracion ya caba ta separando muchanan for di nan mayornan, manera un grupo pro inmigrante a señala, e cambionan aki e gobierno di Trump lo kier bin cun’e pa fortalesa e siguridad fronteriso, como un practica di politica formal.
Gobierno Mericano kier bin cu varios medida, entre cual ta inclui separa muchanan for di nan mayornan, e mayornan lo keda den un centro di detencion y e muchanan lo wordo hiba un shelter.
DHS ta busca pa haci e deportacion di mayornan mas lihe ora cu nan purba recupera nan yiunan den e shelternan di gobierno, ora cu nan comproba cu nan ta den e pais na forma ilegal.
Actualmente, mayornan of adultonan cu ta solicita e custodia di un menor di edad den un shelter di e Departamento di Salud y Recurso Humano (HHS) ta wordo someti na un revision extenso di antecedentenan cu ta inclui datonan riba su status migratorio.
Den luna di November, patruyanan na frontera a detene un total di 29,086 mucha y famianan na e frontera zuid, compara cu 25,492 na October.